Vuelve’l Concursu de Rellatu Curtiu «L’Horru d’El Carbayedo»

La Estaya de la Llingua de la Conceyalía de Normalización Llingüística del Conceyu d’Avilés entama’l XVI Concursu de Rellatu Curtiu «L’Horru d’El Carbayedo». Esta edición, que vuelve dempués d’unos años de parón, busca tratar de mantener vivu esti certame, col oxetivu de puxar pola creatividá lliteraria n’asturianu y dar la oportunidá a los y les participantes d’algamar el reconocimientu d’un xuráu especializáu.

Bases del Concursu de Rellatu Curtiu «L’Horru d’El Carbayedo» (estractu)

1) Podrá participar nel concursu cualquier persona mayor d’edá.

2) Cada participante podrá presentar como muncho dos rellatos ORIXINALES escritos n’asturianu. Nun se van almitir los presentaos n’ediciones anteriores. Los rellatos nun pueden pasar de les 500 palabres. La temática ye llibre y la redaición tendrá que respetar les normes ortográfiques y gramaticales marcaes pola Academia de la Llingua Asturiana; en casu de que nun se cumpliere esto, la obra desaniciaráse; poro, yá nun va poder participar
nel concursu.

3) La presentación sólo puede facese per corréu electrónicu, mandando los rellatos en formatu WORD a avvelhorreo@yahoo.es y contando pa ello cola collaboración de l’asociación El Hórreo del Carbayedo, por ser l’asociación vecinal qu’entamó’l concursu nel añu 2007. Los trabayos van dir encabezaos por un TÍTULU y firmaos namái con un NOMATU. Nel corréu electrónicu tien d’axuntase un archivu aparte, tamién en word, que l’Asociación de Vecinos El Hórreo guardará en secretu, ensin que’l xuráu pueda conocelu enantes del fallu, con estos datos: nome, teléfonu, señes, DNI, y títulu/os presentáu/os al concursu.

4) El plazu d’almisión d’obres piésllase’l día 21/12/2025, a les 14 hores. En pasando’l plazu de presentación, la AA. VV. El Hórreo mandará los rellatos (ensin los datos de los autores) al Xuráu pa que faiga la so valoración y falle’l premiu.

5) L’órganu instructor del procedimientu sedrá la técnica responsable, que sedrá quien tomará toles midíes necesaries pal desendolcu d’esta convocatoria. L’órganu competente pa resolver sedrá la Conceyala Responsable de Normalización Llingüística, a propuesta del órganu instructor previu fallu del xuráu.

6) El xuráu oficial del Concursu de Rellatu Curtiu «L’Horru d’El Carbayedo» tará compuestu por un númberu impar de persones xuníes al ámbitu de la llingua asturiana de reconocíu prestixu lliterariu, académicu y/o profesional. Les persones qu’actúen como xuráu, nomaránse por Resolución de la Conceyala Responsable de Normalización Llingüística La decisión del xuráu sedrá vinculante, y el fallu nun se puede retrucar. Tará presidíu por un miembru del mesmu, exerciendo la Secretaría un funcionariu/a del Conceyu d’Avilés, que nun tendrá nin voz nin votu. El xuráu podrá declarar el concursu ermu, si considera que nengún de los trabayos tien méritos abondo o nun s’axusten a les normes de la convocatoria.

7) Los premios van dase según los principios de publicidá, tresparencia, oxetividá, igualdá, non discriminación y col procedimientu de concurrencia competitiva. Valoraráse la orixinalidá de los trabayos y la calidá lliteraria d’ellos pa llegar a un alcuerdu nel fallu del xuráu. Serán los que vienen darréu:

Primer premiu: 1.000 euros. Finalista: 800 euros.

A los premios aplicaránse-yos los impuestos y deducciones que marque la llei.

8) El resultáu notificaráse pela sede electrónica a les persones ganadores y finalistes, siendo’l fallu de los premios el día 23 d’avientu y la entrega simbólica de los mesmos el día 29 d’avientu (el pagu real de los premios fadráse per tresferencia bancaria). La organización del concursu esixirá la presencia de les persones ganadores y finalistes de los premios o de los/les sos representantes, como condición previa p’algamar los premios, asina como la llectura de los rellatos ganadores nesi actu. La Resolución de concesión de los premios publicaráse y notificaráse a les persones premiaes, teniendo d’aportar la documentación solicitada pal pagu del premiu nel plazu de 7 díes naturales dende la concesión del premiu, y en tou casu enantes del 30 d’avientu de 2025; en casu contrariu quedará refugada la so petición; esto ye, el premiu concedíu.

*NOTA: Esta información sobre’l Concursu de Rellatu Curtiu «L’Horru d’El Carbayedo» ye un estractu-resume de les bases xenerales. La convocatoria oficial colo datos completos sobre’l concursu publicaráse nel BOPA del 12 d’avientu de 2025.