Francisco Priegue (Avilés, 1991) presenta’l poemariu Les verdaderes poses del home planta (Cuatro Gotes, 2024). Francisco ye un escritor mozu pero con un percorríu bien ampliu tanto en castellán como n’asturianu. Dende bien neñu entama a escribir en castellán, espublizando los poemarios Llegar tarde es una rutina (El Patio, 2011), Desde momentos encapsulados (Premio P de Poesía, Groenlandia, 2013), Cuando la ciudad declama (Camelot, 2016), La procesión nocturna de los treinta y cinco demonios (Camelot, 2016) y La ayuda del abismo (Camelot, 2020). Miembru de l’Asociación d’Escritores d’Asturies, yá en 2017 forma parte de la VII Xunta d’Escritores d’Asturies que se celebra en Villaviciosa. Un añu depués, en 2018, recibe’l I Premiu Antón de Marirreguera de poesía n’asturianu y al siguiente espubliza’l poemariu galardonáu baxo’l títulu Chemtrails surden na mio boca (Saltadera, 2019).
La obra de Francisco Priegue espándese y espárdese como’l micelu nuna viesca. Pieces suyes en dambes llingües puen atopase en revistes y antoloxíes varies como Lluvia de Palabras, Formientu, Lliteratura, Ítaca, HazConDi Versos o Groenlandia. Nos últimos tiempos dedícase a esplorar les posibilidaes qu’ufre mecer performance y poesía, una tendencia que lu lleva a esplorar estayes y formatos innovadores. Les verdaderes poses del home planta (Cuatro Gotes, 2024) ye’l so poemariu más nuevu. Entrevistámoslu al rodiu del homenaxe a la naturaleza que supón esti llibru, pa entender meyor la evolución d’un autor yá conocíu nesta casa.
¿Cuál foi la to inspiración y cómo surde la idea de crear esta obra?
Esti poemariu surde de la esperiencia de voluntariáu nel Bosque Comestible
d’Avilés, mientres l’adolescencia, gracies a l’antigua plataforma xuvenil El Patio,
amás de delles visites a Libélula Huerta, que sigo faciendo tovía güei. Otra manera
de manifestar la naturaleza nesti llibru vien de los viaxes que facía de neñu cada
branu con mios padres pa la tierra estremeña d’una parte de los mios antepasaos.
Ensin escaecer la mio otra ascendencia n’aldea de La Llamera, nel Conceyu Sotu’l
Barcu.
¿Cómo tomes la decisión de llamar al llibru “Les verdaderes poses del home
planta”?
Llegando a los mios güeyos la obra cola qu’algamara ciertu reconocimientu l’artista
visual Joaquín Vila, con esos homes a los que-ys salía un árbol del pescuezu, el
poemariu diba tar escritu na mio mente en llingua inglesa, asina que baraxé la
posibilidá de llamalo “Wooden Abdomen”. Llueu ocurrióseme titulalo “El hombre
planta” y facelo en castellán. A la fin, decidí da-y’l títulu actual y escribilo
n’asturianu.
¿Qué importancia tien la naturaleza nel to procesu creativu?
La naturaleza ye una de les vértebres que sostienen la columna de la mio obra, cosa
a la que tamién se-y xune l’erotismu y un discursu que bebe abondo del movimientu
surrealista. La naturaleza ye la más importante manera que tien el ser humanu
d’autoconocese y de conocer el so llinaxe.
¿Qué importancia tien para ti escribir n’asturianu y qué desafíos supon en
términos d’espardimientu de la obra?
La pallabra ye una de les maneres que tien el ser humanu d’espresase, poro,
cualesquier llingua humana tien la oportunidá y, en ciertu mou, la obligación de ser
conocida y utilizada. L’asturianu ye una llingua mui musical, idea que compartimos
munches de les persones qu’escribimos nesta llingua tan moldiable. Cuando la xente m’entruga por qué escribo n’asturianu, amás d’en castellán, siempres digo lo
mesmo: ye la llingua d’una parte de los mios antepasaos y, como dixera enantes, tien
una sonoridá mui afayadiza.
¿Rellaciones de dalguna forma los elementos naturales col poema
correspondiente?
Talamente. Cada poema tien el nome n’asturianu y el nome científicu, como si’l
llibru fuera un tratáu de botánica. Rellaciona cada planta, siempres faciendo énfasis
no que representa pa min o lo que creyo que representa pal restu de mortales esi
vexetal, amestándolo, como dixera nuna entruga anterior, col erotismu, el
movimientu surrealista y l’heriedu que nos dexaron les nueses güeles y güelos.
¿Qué te gustaría saber sobro la esperiencia de los y les llectores?
Prestaríame saber qué significáu tienen pa ellxs viaxar pal cáliz y los estames, pa la
corola, pa los frutos y les fueyes, pal golor, en definitiva, la tresformación que pa
ellxs puen tener les plantes que protagonicen esti llibru.
¿Qué significáu tien pa ti Formientu, onde yá publicasti?
Formientu ye la mio casa. Munchos de los primeros poemes n’asturianu qu’empecé
a escribir, acullá pol 2014, tán publicaos en Formientu. Ye una plataforma
perimportante pa descubrir les nueves voces y pasar un ratín prestoso lleendo
lliteratura moza n’asturianu. Faigo un llamamientu pa que tolxs mocxs manden los
sos testos a Formientu. Quién sabe, igual pente les sos fueyes atopamos lxs nuevxs
Whitman y Safo de la lliteratura n’asturianu.
 al rodiu del poemariu "Les verdaderes poses del home planta".){kind=link}