Los videos de les actividaes superaron les 15.000 reproducciones nestos díes
La plataforma lliteraria Formientu.com ta acabante anunciar l’ampliación del so festival cultural fechu dende casa entamáu coincidiendo col aisllamientu de la población pola mor del andanciu de coronavirus. Tres l’ampliación del zarru de la sociedá nos sos llares, el #FormientuEnCasaFest va ampliar les sos actividaes diaríes hasta’l 13 d’abril, col mesmu espíritu col que ñació “ufrir a la xente actividaes lliteraries y culturales que valgan pa face-yos pasar el tiempu d’esti enzarru nes cases y poner en valir la importancia de la cultura asturiana y la llingua asturiana nun momentu como esti”, esplica Inaciu Galán, coordinador xunto a Diego Solís d’esti eventu.
“Los resultaos d’estos díes fueron mui positivos, con más de 15.000 visionaos de los videos y mui bona respuesta de la xente, tamos mui contentos”, añade Galán. “Esto demuestra que la cultura asturiana interesa y que ye necesario siguir nesti camín”, esplica Solís.
Ente la programación que s’amplia a partir del martes 31 cola investigadora Arantza Margolles, que va dar la charra “En busca de los raigaños: xenealoxía dende casa”. El miércoles sedrá la escritora Laura Marcos la que Dea un tallerín tituláu “La ferramienta d’escritura. Técniques pa entamar y meyorar”.
De xueves a sábadu llegará’l momentu pa la música, colos conciertos de Marisa Valle Roso, Luis Núñez y Maxi Areñes, respectivamente.
El domingu Alfredo Garay va ufrir una presentación-recital del poemariu Run y el llunes sedrá Raúl Alonso quien faiga un recital poéticu. El martes 7 María Abril dará la charra “Un rellatu y otres coses”, mientres que’l miércoles 8, Nacho Wings va facer una sesión musical titulada “Discos pa una cuarentena”.
Les últimes charres programes, sedrán les del xueves 9, sobre teatru, con Laura Iglesia, un recital poéticu con Susana Sela, pal vienres 10, una charra de Natalia González Menéndez, “Edición asturiana: recomendaciones d’una llibrera”, pal sábadu 11 y un “Collage pa confinar feliz” por Javier Cayado pal domingu 12. El llunes 13 va presentase’l llibru colectivu “Fecho na cuarentena” con Nicolás Bardio.
Toles charres van poder cvese a les 7 la tarde na páxina de Formientu en Facebook. L’enllaz nel que van poder vese les actividaes ye’l siguiente: https://www.facebook.com/formientu/
Programación AMPLIACIÓN
#FormientuEnCasaFest
(Toles actividaes son a les 19 hores na páxina de Facebook de Formientu)
Martes 31
– Arantza Margolles > Charra: En busca de los raigaños: xenealoxía dende casa.
Miércoles 1
– Laura Marcos > Tallerín: La ferramienta d’escritura. Técniques pa entamar y meyorar.
Xueves 2
– Marisa Valle Roso > Conciertín.
Vienres 3
– Luis Núñez > Conciertín-presentación del discu “Blinca”.
Sábadu 4
– Maxi Areñes > Conciertín-recital dende Areñes.
Domingu 5
- Alfredo Garay > Presentación-recital del poemariu Run.
Llunes 6
– Raúl Alonso > Recital poéticu.
Martes 7
- María Abril > Charra: Un rellatu y otres coses
Miércoles 8
– Nacho Wings > Sesión musical: Discos pa una cuarentena
Xueves 9
- Laura Iglesia > Charra: El teatru n’asturianu, la mio esperiencia personal.
Vienres 10
– Susana Sela > Recital poéticu: Inversu baxo l’agua.
Sábadu 11
- Natalia González Menéndez > Charra: Edición asturiana: recomendaciones d’una llibrera.
Domingu 12
- Javier Cayado > Charra-recital: Collage pa confinar feliz.
Llunes 13
- Nicolás Bardio > Presentación del llibru “Fecho en cuarentena”.
