🎙 Güei vienres tenemos una activdidá de lluxu nel #FormientuEnCasaFest. Silvia Quesada va ufrir un conciertín que nun podéis perdevos. A les 19 hores na páxina de Facebook de Formientu. #quedaencasa y esfruta.
Silvia Quesada tien yá una trayectoria musical importante, onde destaquen les sos collaboraciones como cantante solista colos grupos Los Gatos del Fornu, Blima o Muyeres, formó parte tamién del recientemente disueltu grupu «Tejedor». Nun estilu ayenu a la música folk, formó parte de la banda del autor turonés Alfredo González, productor amás del so primer discu «La pena abierta».
Tres de cinco años de xira con «La pena abierta» y mui bones sensaciones, el pásau 23 de febreru Silvia Quesada finó la temporada de presentaciones d’esti discu únicu nel panorama asturianu.
Nel primer conciertu que l’artista tinetense facía cobrando entrada, algamó’l «sold out» nel hotel Palaciu de Merás de Tinéu, con 200 llocalidaes vendíes y collaboraciones de lluxu como Marisa Valle Roso, Nacho Vegas y Javi Vallina (de la banda Bueno).
Pesllada la puerta qu’abrió con esti discu, el 7 de marzu vuelvió a les plataformes dixitales con un nuevu single escritu por Alfredo González, y que ye l’adelantu del so próximu trabayu discográficu en solitariu. Col título de «La mesma revolución» estrénase una canción feminista de corte pop, pensada pa remover conciencies al tiempu que les tiestes y los pies. Un cantar imprescidible nos tiempos que cuerren que de xuru se convertirá nel himnu del movimientu feminista y que fai d’adelantu del nuevu trabayu discográficu “Prefiero ver llover”.
