El próximu xueves, 22 d’avientu de 2022 a les 19,30 h. tendrá llugar na editorial Pintar-Pintar (Pl. Juan XXIII 7-8, Uviéu) la presentación de la obra Carmilla, la muyer vampiru. Esta novela curtia, publicada en 1872 pol escritor irlandés Joseph Thomas Sheridan Le Fanu, foi traducida al llionés por Xairu López, autor de La Fueya Rota y outros relatos (2020). La obra foi amás prologada por Laura Collar y ilustrada pol artesanu gráficu Ricardo Escobar, que ya contribuyera coles sos ilustraciones a numberoses publicaciones como Llión Máxicu, Los Reis de Llión ou Esbardu, vocabulariu llionés ilustráu. La presentación contará cola participación de los tres collaboradores xunto al xurista y investigador Nicolás Bartolomé Pérez, toos ellos naturales de Llión.
Esta traducción, publicada por Eolas Ediciones, inaugura la colección Lletras Universales cola que l’Asociación Cultural Faceira marca l’oxetivu de poner a disposición de los llectores dalgunes de les obres más relevantes de la lliteratura universal traducíes a la llingua llionesa.
La novela curtia Carmilla ye una de les principales fontes de les que bebió Bram Stoker pa crear la que quiciabes sía la figura más universal del terror fantásticu: Drácula. Esta inquietante hestoria de vampiros presenta pola primer vegada a éstos como seres elegantes y atractivos, al empar qu’aborda la tema del erotismu y l’amor lésbicu nuna dómina na que l’argumentu abultaba fondamente controvertíu. La trama narra la hestoria de Laura y so padre, habitantes d’un vieyu castiellu n’Estiria (Austria) xunto a los sos sirvientes. La so tranquila y monótona vida camuda de sópitu cuando, frente a ellos, un carruaxe ocupáu por una muyer y por Carmilla, la so fermosa y xoven fía, sufre un aparatosu accidente. Tres la decisión del padre de Laura de que la enigmática Carmilla s’agospie nel castiellu xunto a ellos p’alitar del socesu, surdirá entres les xóvenes una rellación d’amistá que trescala la llinia del más apasionáu amor en metá d’una riestra d’alarmantes fechos que xiran alredor del comportamientu de la recién llegada.
El llibru ya pue adquirise al traviés de www.eolasediciones.com y tará disponible nos próximos díes en cualquier llibrería de referencia.
