El próximu vienres 12 d’avientu de 2025 a les 19,00h remata la cuarta edición del Ciclu de poesía QED , un conxuntu de recitales poéticos qu’un añu más se fixo nel Salón d’Actos de la Biblioteca d’Asturies “Ramón Pérez de Ayala” (El Fontán, Uviéu) a lo llargo de la seronda. Amás, el sábadu 13 d’avientu va presentase na Casa de la Cultura de Grau la primer antoloxía de poetes asturianos en portugués, que lleva por títulu Para alem dos glaciares e do cemitério de sóis (Editorial Officium Lectionis).
Esti ciclu, coordináu pol poeta Miguel Rodríguez Monteavaro (Premiu Xuan María Acebal de Poesía 2024), cuenta col apoyu de la Conseyería de Cultura, Política Llingüística y Turismu del Principáu d’Asturies.
El QED sigue fiel al so oxetivu d’axuntar les voces poétiques d’Asturies coles d’otres llingües y territorios, creando un espaciu de diálogu lliterariu y d’intercambiu cultural que s’estiende más allá de les fronteres asturianes. Como n’ediciones anteriores, el ciclu pretende ser un puntu d’encuentru ente xeneraciones, estilos y tradiciones poétiques, apostando pola calidá, la diversidá y la vitalidá de la palabra viva.
Última sesión del QED 2025
El vienres 12 a les 19.00 hores va poder disfrutase de la última sesión del Ciclu de Poesía QED 2025 nel Salón d’Actos de la Biblioteca d’Asturies “Ramón Pérez de Ayala” (El Fontán, Uviéu). Esta última sesión cunta cola participación de tres autores que, como ye costume, confirmen la variedá d’estilos, xeneraciones y temátiques que son seña d’identidá del QED:
Diego García Riesgo – Poeta y filólogu, acaba de publicar la so primer obra cola Editorial
Trabe.
Taresa Lorences – Profesora y poeta, con una trayectoria destacada na investigación y divulgación de la llingua asturiana. Ye una de les voces con más personalidá del Segundu Surdimientu.
Yashuhiro Yotsumoto – Poeta xaponés residente n’Alemaña, una de les voces más internacionales de la poesía contemporánea asiática, con una obra que combina ironía, humor y reflexión sobre la globalidá y la identidá.
Poesía pa una conexón astur-portuguesa
El sábadu 13 a les 13.00 hores na Casa la Cultura de Grau va tener llugar la presentación del llibru Para além dos glaciares e dos cemitérios de sóis. Antologia de poesia asturiana comtemporânea (Editorial Officium Lectionis). Nel eventu van tar el traductor Jorge Melícias, l’editor José Rui Teixeira, voces destacaes de la poesía y la crítica portuguesa, y Fernando Álvarez Balbuena, filólogu espertu en llingües romániques, que van presentar la primer antoloxía n’edición billingüe asturianu/portugués.
Esta antoloxía ye un apueste decidíu de construyir y reforciar pontes ente cultures, pensáu «col envís d’amosar la cantidá y la calidá de los y les poetes que publiquen orixinalmente n’asturianu, esta selección de 22 escritores constitúi un intentu de pagar una delda histórica ente dos territorios que nunca nun deberieren habese separtao.» L’equipu responsable del procesu editorial confía en «qu’esti volume traducíu al portugués llegue a más llectores y valga para conectar la poesía asturiana con otres lliteratures, seya’l que seya’l so país d’orixe. Equí, una amuesa de la lliteratura asturiana d’anguaño, una tierra considerada «periférica», pero que tien una forma muy particular de presentase al mundu del sieglo XXI.»
 ponen el ramu al Ciclu de Poesía QED 2025.){kind=link}