El Boletín Oficial del Principáu d’Asturies (BOPA) del pasáu 27 d’agostu incluyía un decretu mui esperáu pola comunidá asturiana: a la fin s’inclúi la enseñanza d’asturianu dientro del currículum ufiertáu pola Escuela Oficial d’Idiomes (EOI). Esta noticia supón un pasu mui importante pa la regularización total de la enseñanza de les llingües llariegues d’Asturies, quedando asina únicamente la Formación Profesional (FP) pendiente de normativa específica.
La disposición publicada nel BOPA, qu’inclúi l’asturianu y l’eonaviegu o gallego-asturianu, anuncia una implantación progresiva de la enseñanza por niveles de competencia. La realidá d’esti procesu dependerá, en tou casu, de la suficiencia técnica y presupuestaria que permita la execución efectiva del plan educativu. Sicasí, la disposición afirma que’l primer añu d’implantación van incluyise los cursos de nivel básicu (A1 y A2), intermediu B1 y avanzáu C1 d’asturianu. El segundu añu plantégase ufrir tamién, amás de los yá implantaos, los cursos intermediu B2 y avanzáu C2 d’asturianu. La enseñanza de gallego-asturianu o eonaviegu queda pel momentu pendiente de completase la normativa de niveles de certificación.
Esti decretu busca averar l’estáu real de les llingües minoritaries (o minorizaes) d’Asturies a los oxetivos firmaos yá en 1992 a nivel européu. La Carta Europea de les Llingües Rexonales o Minoritaries dispón, nel artículu 7.1.f , que «los Estaos firmantes van basar la so política, la so llexislación y la so práctica en materia de llingües rexonales o minoritaries, ente otros oxetivos, na provisión de formes y medios adecuaos pa la enseñanza y l’estudiu de les llingües rexonales o minoritaries en tolos niveles.»
L’estractu del BOPA puede lleese equí.
