El microteatru infantil llega al asturianu con «El xigante llorón»

El panorama lliterariu asturianu, caldía más bayurosu y dinámicu, ta de norabona pola llegada d’una obra dafechamente orixinal. El microteatru infantil yera ún de los formatos que faltaben por esplorar na nuesa llingua. Esta situación vieno a iguala l’autor y docente Xavier Frías Conde col apoyu visual de los dibuxos d’Enrique Carballeira. La obra de microteatru infantil que firma Frías Conde col títulu El xigante llorón y otres micropieces ye una propuesta que ñaz de la voluntá pedagóxica d’educar al traviés del arte.

El microteatru como ferramienta pedagóxica

Nestos tiempos que cuerren paez que la tendencia ye que caldía too vaya más rápido, dure menos y seya más cenciello. Toles formes de cultura vense afectaes por esti fenómenu y medios como’l cine o la lliteratura nun queden al marxe. Ésto pue resultar especialmente problemático nel casu de la reciella, como bien saben docentes, pas y más. La capacidá d’atención de la xeneración ñacida a finales de los 90′ y nos primeros años 2000 yá se vio afectada col usu y consumu xeneralizáu d’internet y los neños y neñes d’anguaño ñacen yá nun mundu hiperaceleráu.

El contestu ye innegable, pero inda nos momentos asina surden rescamplos d’optimismu. Frías Conde analiza esta situación y ufre carreros nuevos p’averar el teatru y la lliteratura en xeneral a la reciella. De siempres hubo lliteratura y teatru infantil, adecuaos a la edá, entós ¿por qué nun adaptar el formatu a les nueves tendencies pa llograr xenerar esi interés? Dende’l puntu de vista pedagóxicu, el microteatru infantil ufre la posibilidá de tratar temes de forma condensada y permite que los neños y neñes esfruten, de primera mano y nun espaciu de tiempu adecuáu pa los sos ritmos d’anguaño, de la maxa del teatru. Si la obra de teatru del colexu pa Nadal o pa fin de cursu foi siempres un eventu pal alumnáu, el microteatru permite condensar esa esperiencia nuna sola sesión. El potencial llúdico-educativu qu’ufre esti formatu ye un valor desconocíu qu’abre nueves víes pa que los y les docentes llogren conectar col alumnáu al traviés de la lliteratura. El microteatru infantil d’El xigante llorón y otres micropieces nun ye sólo arte, sinón que tien una clara vocación de ferramienta pedagóxica.

El xigante llorón y otres micropieces

¿Qué asocede cuando un sabiu vieyu, tres un supuestu viaxe astral, pronuncia unes palabres imposibles de descifrar y tou un conseyu de sabios se dediquen a dar interpretaciones delirantes? ¿Qué pasa cuando los monstruos peludos de les cueves siéntense fracasaos porque yá nun llogren asustar a naide? ¿O cuando un abusón escolar choca cola inesperada fuerza d’una güela que torna dende l’otru mundu pa protexer al so nietu?

Nesta obra de microteatru infantil, El Xigante Llorón y otres micropieces, Xavier Frías Conde axunta un puñáu de pequeñes xoyes teatrales que se lleen d’una tirada, pero que dexen resonando la risa, la tenrura y, sobre manera, la sorpresa. Son escenes curties, áxiles, cargaes d’absurdu y humor, que recuerden que’l teatru tamién puede ser un xuegu traviesu onde lo inesperao siempres acecha al volver la esquina.

Asina funciona la imaxinación de Frías Conde: rir de lo solemne, atrevese colo grotesco y convertir lo cotidiano nun escenariu onde tou ye posible. La solemnidá de los sabios qu’intenten traducir palabres ensin xacíu acaba siendo desmontada por una neña que ve lo obvio. Los monstruos, en llugar de provocar mieu, confiesen les sos frustraciones como si fueren oficinistes que nun lleguen a los sos oxetivos. Y en una cai cualesquier, un neñu acosáu atopa nel cayáu de la so güela difunta la xusticia que nunca-y daríen nin maestros nin policíes.

Xavier Frías Conde

Francisco Xavier Frías Conde (Béjar, Salamanca 1965) ye escritor, llingüista, ya investigador de filoloxía románica y árabe. Vive en Madrid dende 1974, magar que la so familia ye d’Ayande y ye un estudiosu de la situación del gallegu d’Asturies.

Como autor, tien espublizaes delles obres en gallegu, portugués, castellanu y asturianu; tocando casi tolos xéneros: poesía, ensayu, narrativa, teatru y traducción. Dirixó’l suplementu cultural de la desapaecida “Mesa pola defensa do galego de Asturias”, O Espello. Anguaño ye ún de los coeditores de la editorial Lastura y compaxina la so actividá docente na UNED col llabor lliterariu. Frías Conde abre estaya nel panorama de la lliteratura n’asturianu cola obra de microteatru infantil El xigante llorón y otres micropieces, que yá va camín de les meyores llibreríes pa llegar a neños y neñes nesta campaña navidiega.