La conseyera de Cultura, Política Llingüistica y Deporte, Vanessa Gutiérrez, presidía la reunión del plenu del Conseyu del Patrimoniu Cultural d’Asturies, máximu órganu asesor en materia patrimonial del executivu, na qu’aprobáronse les declaraciones como Bien d’Interés Cultural (BIC) de la colección artística de l’antigua «Caja de Ahorros de Asturias», el yacimientu arqueolóxicu de Lucus Asturum, en Llanera, ya’l teatru popular o costumista asturianu.
Les propuestes de protección d’estos trés elementos d’especial importancia histórica y artística pa la comunidá van ser llevaes agora al Conseyu de Gobiernu pa la so aprobación definitiva por decretu.
En Formientu celebramos esti avance pal patrimoniu cultural asturianu y nun quiximos perder la oportunidá de destacar especialmente’l casu del teatru popular asturianu, d’evidente interés pal mundu lliterariu de la nuesa tierra.
El teatru popular asturianu
El teatru popular o costumista asturianu constitúi un fenómenu escénicu y sociocultural singular de la nuesa tierra. Defínese como’l conxuntu d’obres dramatúrxiques n’asturianu, representaes y producíes dende los estratos non privilexaos de la sociedá y dirixíes principalmente a un públicu d’origen asemeyáu. Esti movimientu caltién la so continuidá dende aprosimadamente 1920 hasta anguaño.
El so orixe vincúlase a les esperiencies teatrales al rodiu de les distintes sociedaes de Cultura y Hixene que desarrollaron el so llabor nel Xixón de les primeres décades del sieglu XX. Con too, el fenómenu estiéndese rápidamente pel restu d’Asturies yá nos primeros años, alcontrándose un movimientu asociacionista bien consolidáu en tol territoriu con plantegamientos asemeyaos, qu’atopa nl teatru amateur una fórmula más pal desendolcu cultural de los sos postulaos.
Destaquen nesta manifestación cultural, como principales valores significativos, los siguientes: el so marcáu carácter popular y comunitariu, cola democratización cultural que supón el protagonismu de los estratos non privilexaos de la sociedá como productores, reproductores y espectadores; la so rellación cola sociedá asturiana y les sos visiones identitaries; el caltenimientu del asturianu; la particularidá y bayura del so corpus lliterariu y de la so espresión escénica; los más de cien años d’hestoria continuada y la so vixencia. A too ello súmase’l fechu de tratase d’una espresión artística llariega y una singularidá asturiana, como fechu cultural ñacíu n’Asturies y esclusivu d’esta sociedá.
Nesti contestu, la conseyera Vanessa Gutiérrez aprovechó pa recordar que la XLVII Selmana de les Lletres Asturianes, que va celebrase esti mesmu 2026, va tar dedicada al teatru costumista y a la recuperación de la figura de Taresa Cónsul, primera muyer conocida qu’escribió teatru n’asturianu. La programación va percorrer la evolución de les artes escéniques n’asturianu dende’l sieglo XVII hasta anguaño.
