El narrador y dramaturgu Francisco González-Banfi (Palacios del Sil, 1964), algamó’l I Premiu de Lliteratura en llionés «Caitano Álvarez Bardón», convocáu pol Institutu Llionés de Cultura, na primer edición d’esti gallardón pioneru en tola hestoria de l’alministración provincial, cola novela curtia titulada «Fasgadiel».
A xuiciu del xuráu, trátase d’una obra «que concentra un universu tradicional, mesmo que fantásticu, narráu en primer persona por una muyer moza, con una serie de viaxes polos montes de Llión en época romana, onde puede vese Asturica Augusta (Astorga) y les fontes del Ganges na India. El xuráu tamién destacó la calidá y la orixinalidá de les obres presentaes. Esti premiu ta dotáu con 3.000 euros y la edición de la obra ganadora.
Nesta primer edición, tuvo formáu el xuráu por José Ramón Morala, catedráticu de Filoloxía Hispánica pola Universidá de Llión; María Cristina Egido, profesora de Filoloxía Hispánica pola Universidá de Llión; Nicolás Bartolomé Pérez, escritor ya investigador; y Cirenia Villacorta, secretaria de la Diputación Provincial de Llión y del ILC, en calidá de secretaria.
El Premiu de Lliteratura en llionés «Caitano Álvarez Bardón» ye un certame nuevu bienal, creáu p’apoyar y estimular la creación lliteraria en cualesquier de les variantes d’esta llingua romance esistente dientro de la provincia. El gallardón, al que se presentaron una decena d’orixinales, taba abiertu a testos narrativos, pero tamién a poemarios, ensayos y obres teatrales.
