L’autora va tar nel mes d’agostu na RLX trabayando nos sos proyectos lliterarios
Esti mes d’agostu la Residencia Lliteraria Xixón nun apara. La escritora peruana residente en París Maria Esther Alarcón-Nebout va tar d’estancia creativa en Xixón, aprovechando’l tiempu pa participar en delles actividaes con autores asturianes y p’avanzar nos sos proyectos lliterarios.
L’autora ta acabante presentar «Partise en dos», una compilación de rellatos que narren una esperiencia vital qu’escasamente se cunta en femenín: la migración. Nes sos páxines, trece autores esploren les fisuras y recomposiciones que provoca l’esiliu, la esraizadura, la doble pertenencia llingüística y cultural. Estes voces cunten dende la memoria, el cuerpu, l’idioma y la esperiencia íntima d’habitar una tierra que non siempre les reconoz, mientres elles busquen nomase de nuevo. Hestories de perda, adaptación, reinvención y resistencia, texíes cola fuercia de la escritura que remanez cuando la identidá se biforca, pero nun se da. Un llibru que dialoga cola memoria colectiva, dando testimoniu del poder de la lliteratura como espaciu d’enraigonu.
Maria Esther Alarcón-Nebout (Lima, 1969) escritora y profesora d’escritura creativa nacida en Perú, afincada en París dende va 28 años. Diplomada en publicidá pel Institutu Peruanu de Publicidá (Perú), máster en Ciencies Polítiques na Universidá de la Sorbona de París. Tres quince años trabayando na industria de la moda, volvió a la so gran pasión: la lliteratura.
Fixo cursos d’autoficción nos Ateliers NRF Gallimard (París) y un programa de narrativa curtia n’inglés na Universidá de Londres (París), amás del Llaboratoriu de rellatu na Escuela de Escritores de Madrid. Completó la so formación lliteraria con un Máster en Narrativa na Escuela de Escritores de Madrid (primer añu) y un posgrau n’Especialización na enseñanza de la Escritura Creativa na Universidá d’Alcalá (España). Especializóse n’escribir sobre migración y maternidá.
En 2022, creó en París el proyectu Mujeres que se conMueven – Women with moving Identities pa enseñar escritura creativa a otres muyeres migrantes n’Europa.
En 2024, supervisó y editó la escoyeta de rellatos d’escritores migrantes n’Europa: Partirse en dos, publicáu en xunu de 2025 por Lecturas de Arraigo (Madrid). Anguaño estrema’l so tiempu na traducción al francés del mesmu y l’escritura de la so primer nouvelle.
Residencia Lliteraria Xixón
L’escritor y xestor cultural Inaciu Galán vivió nesti espaciu de Xixón a lo llargo de cuasi una década y en 2023 punxo a disposición l’apartamentu pa la creación lliteraria dende Asturies, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación, dende llugares como Galicia, Arxentina, Italia, Inglaterra o’l País Vascu, ente otros.
