La celebración de San Xurde el 23 d’abril, Día del Llibru, marca un fitu nel calendariu de feries lliteraries d’Asturies, qu’entra na so fase más intensa. A partir d’esta fecha señalada pa editores, autores y llectores, les feries del llibru van sucedese de forma más siguida en distintos puntos del territoriu. En toes elles va haber presencia de la lliteratura n’asturianu, mesmo coles editoriales especializaes como Cuatro Gotes, Trabe o La Fabriquina, ente munches otres, que con autores y otros axentes culturales.
Mesa redonda en LLIBROS Feria del llibru de Corvera.
Feries lliteraries primaverales
Tres les cites en Xixón (La Feria de la Edición Asturiana – FEA) y les feries de Morcín y Corvera, la fastera occidental d’Asturies prepárase agora pa garrar protagonismu. La fin de selmana del 25 y 26 d’abril va ser especialmente activa, cola celebración simultánea de delles feries. Navia va acoyer la so feria del llibru dambos díes, con casetes, presentaciones y actividaes. Esi mesmu fin de selmana, tamién va sumase Ḷḷuarca, ampliando la ufierta cultural nel occidente asturianu.
L’actividá lliteraria va siguir con fuercia mientres nos meses de mayu y xunu, calteniendo’l
puxu cultural en tol territoriu.
En mayu, una de les cites más destacaes va ser la OFELIA, la Feria del Llibru d’Uviéu, que se va celebrar del 7 al 10 y va axuntar editoriales, llibreríes y autores nuna cita d’estrena que promete ser un nuevu referente dientro del calendariu asturianu. El sábadu 16 de mayu Tinéu va acoyer la Feria del Llibru de Navelgas, con una programación cercana y participativa que busca descentralizar la vida cultural de les grandes ciudaes. Ente los actos destacaos tán el “Panlibro 2026”, l’homenaxe a Xuan Bello y l’actuación de Vaudí. L’eventu busca fomentar la llectura y la cultura nel mediu rural, aprovechando l’entornu privilexáu del conceyu de Tinéu. Yá na última fin de selmana del mes va ser el turnu de Llanes, que va celebrar la so feria lliteraria del oriente asturianu, atrayendo a los visitantes la Feria del Llibru del Valle de San Jorge.
Feries lliteraries del branu
En xunu, una de les cites más relevantes va ser la Feria del Llibru de Xixón, la famosa FELIX, que va tener llugar del 16 al 21 d’esti mes. Esti eventu, que ye una de les cites lliteraries más importantes del norte de la península, va volver a contar con una presencia bien granible d’autores, firmes, presentaciones y actividaes pa tolos públicos.
El calendariu sigue avanzando colos dos grandes eventos lliterarios de referencia del mes de xunetu. La Selmana Negra de Xixón, del 3 al 12 de xunetu, va volver a ser la cara más festiva del branu lliterariu coles sos casetes, presentaciones, firmes y charres, cola novela negra como gran protagonista, anque abierta a otros xéneros y propuestes culturales. D’otra banda, el Celsius 232, que se va celebrar del 14 al 18 de xunetu n’Avilés, va axuntar a aficionaos y autores de la ciencia ficción, el terror y la fantasía, consolidándose como ún de los festivales más destacaos del xéneru.
D’esta miente, Asturies confirma un añu más la so posición como un territoriu especialmente activu no que cinca a les celebraciones alredor del llibru, con una programación continua que acompaña a autores y llectores a lo llargo de tola primavera y el branu.
