Les Xornaes Internacionales d’Estudiu de l’Academia de la Llingua Asturiana (ALLA) entren mañana martes na so edición númberu 43. L’Edificiu Históricu de la Universidá acueye tres xornaes d’actividaes académiques, ente’l martes y el xueves, con conferencies, comunicaciones y presentaciones. Toes elles son abiertes dafechu hasta enllenar los aforos.
Los tres conferenciantes programaos pal primer día son Juan Carlos Moreno Cabrera (Universidad Autónoma de Madrid), que presenta «El asturiano y la dialectología españolista»; Xulio Viejo Fernández (Universidá d’Uviéu), que va echar una güeyada «Dende l’Ástura hasta la mar: entrar n’Asturies al traviés de la toponimia»; y Hugo Carbonnelle (Sorbonne Université), que va falar de «Los sufixos asturianos ‘-ón1’, ‘-on2’ y ‘-ón3’: una historia del morfema protorrománicu */-‘on-e/». El miércoles van poder escuchase les conferencies de Pascual Riesco Chueca (Universidad de Sevilla), sobre’l «Léxico diferencial al sur del Duero: pervivencia y sustitución»; y de Javier Giralt Latorre (Universidad de Zaragoza), que va buscar les «Afinidades entre la toponimia mayor asturiana y aragonesa». El xueves tán programaes les conferencies de Jairo Javier García Sánchez (Universidad de Alcalá), alredor de los «Resultados del latín sursum, con ‘sub-‘, en la toponimia hispánica»; y d’António Bárbolo Alves (Universidade de Trás-os-Montes e Alto Douro) que, en coautoría con Henrique Manuel Pereira (Universidade Católica Portuguesa), va presentar «Guerra Junqueiro i l mirandés: ancontros i zafios lhenguísticos i culturales».
Con un pesu destacáu dientro del programa, les diez comunicaciones previstes van presentase en cinco meses a lo llargo de les Xornaes. Los temes, bien estremaos, van dende’l Nueu Canciu Astur a la lliteratura asturiana na emigración cubana, pasando pela traducción o l’estudiu etimolóxicu. Dos presentaciones completen estes Xornaes. Ana María Cano González y Carlos Lastra López van amosar el conteníu de los númberos más nuevos de les revistes Lletres Asturianes y Ciencies: Cartafueyos Asturianos de Ciencia y Teunoloxía. Pel so llau, Claudia Elena Menéndez Fernández y David Guardado Diez presenten los «Nuevos proyectos lexicográficos de l’Academia de la Llingua Asturiana: estáu actual y perspectives de futuru».
Nel actu d’apertura d’estes XLIII Xornaes Internacionales d’Estudiu, convocáu pa mañana martes 4 a les 12 h del meudía, ta prevista la participación del Presidente de l’Academia, Xosé Antón González Riaño; del Rector de la Universidá d’Uviéu, Ignacio Villaverde; y del Decanu de la Facultá de Filosofía y Lletres, Francisco Martín Miguel.
El programa completu puede consultase equí.
