Gonzalo Llamedo Pandiella, Iyán Caldevilla y Hugo Menéndez Montes ganen los Premios
Asturies Xoven de Poesía, Narrativa y Testos Teatrales. El director xeneral de Mocedá destaca’l notable aumentu de la participación nel certame, dotáu con 3.000 euros y la publicación de les obres.
Les obres Venir de Marte, de Gonzalo Llamedo Pandiella; Panexíricos pa los qu’escaecieron volver, de Iyán Caldevilla, y Rambalín, d’Hugo Menéndez Montes, fueron galardonaes colos Premios Asturies Xoven nes sos modalidaes de poesía, narrativa y testos teatrales. Los autores van recibir 3.000 euros, amás de la publicación de les obres premiaes; cada ganador va recibir 50 exemplares.
El xuráu destacó del poemariu Venir de Marte, de Gonzalo Llamedo “la escucha y unidá temática qu’enceta la identidá dende la memoria, el cuerpu y la resistencia”. De la narración de Iyán Caldevilla, Panexíricos pa los qu’escaecieron volver, resaltó “la prosa de
peralta calidá que reivindica’l territoriu y l’identidá, dándo-y una unidá temática énte la muerte”, y sobre la obra de teatru Rambalín, d’Hugo Menéndez, valoró “el desenvolvimientu progresivu del personaxe, marcáu dende lo emocional”.
Nesta edición el director xeneral de Mocedá, Francisco de Asís Fernández Olanda, presidió’l xuráu de los Premios Asturies Xoven. El xuráu tuvo integráu pol director de la Escuela Superior d’Arte Dramático (ESAD), Pedro Ignacio Ortega; la doctora n’Investigaciones Humanístiques pola Universidá d’Uviéu, María Fernández Abril, y l’escritor y director de la Selmana Negra de Xixón, Miguel Barrero. Fernández Olanda destacó l’amplia participación nesta edición, na que se recibieron 19 obres de poesía, 10 de narrativa y 10 testos teatrales, 39 frente a les 11 rexistraes en total nel pasáu exerciciu. De los ganadores, el director xeneral aseguró que “caracterícense pola coherencia y claridá espresiva, que comparten al ser d’una xeneración fuerte, rica en cultura, comprometida col territoriu y con un sentimientu y un raciociniu bien afitáu nel sentíu de los tiempos, y que tien ganes d’escribir coles sos manes y n’asturianu el futuru d’Asturies”.
Con estos galardones, los Premios Asturies Xoven siguen consolidándose como referencia pa la promoción de nuevos talentos lliterarios nel Principáu. La iniciativa ye un apueste del Institutu Asturianu de la Mocedá pa caltener el compromisu col talentu de mozu d’Asturies.
Los autores
Gonzalo Llamedo Pandiella (1990) ye profesor y investigador nel Área de Filoloxía Románica de la Universidá d’Uviéu.
Hugo Menéndez Montes (1996) cursó estudios d’arte dramático n’interpretación testual na ESAD Asturies y Dirección Escénica y Dramaturxa na RESAD de Madrid.
Iyán Callevilla (1995) ye graduáu en física pola Universidá d’Uviéu y master en creación de videoxuegos pola Barcelona School Off Management de la Universidá Pompeu Fabra
