15 poemarios presentáronse esti añu a la convocatoria de la Sociedá Popular La Regalina de Cadavéu
El premiu Fernán Coronas – Padre Galo de poesía en llingua asturiana fallóse esti xueves na casa natal del escritor en Cadavéu. La ganadora resultó ser la escritora d’Ouviñana (Cuideiru) Mercedes Ruisánchez Gutiérrez, col poemariu «Camín de casa».
El xuráu destacó del poemariu l’autenticidá tanto llingüística como hestórica, la emoción cola que se refier a una biografía que podía ser la de munches muyeres de finales del sieglu XX, plena de vivencies crudes y doloroses por mor de la represión; pola sensibilidá que hacia la naturaleza y hacia los seres más vulnerables.
Mercedes Ruisánchez Gutiérrez natural d’Ouviñana (Cuideiru) y vecina d’Avilés. Estudió n’Uviéu Filoloxía Románica. Trabayó durante 34 años n’Educación impartiendo per un llau clases de Llingua Castellana y de Llingua y Lliteratura Asturiana nel IES Carreño Miranda d’Avilés asina como dellos años como asesora técnico docente nel CPR d’Avilés llevando l’área de sociollingüística. Agora ta xubilada y dedica’l tiempu a la escritura y a trabayos de gran importancia como son «escuchase con atención y ver pasar la vida», esplica l’autora premiada.
El concursu que se falla cada añu coincidiendo col aniversariu de la nacencia del Padre Galo ta integramente patrocináu pol establecimientu hoteleru “La reserva de los campos”, y dotáu con 900 euros de premiu, asina como la posibilidá d’espublización.
El xuráu tuvo presidíu por Inaciu Galán, escritor y miembru de l’Academia de la Llingua Asturiana. Fueron miembros del mesmu María Esther García López, ganadora de la edición anterior y presidenta de l’Asociación d’Escritores d’Asturies, Susana Sela, escritora y animadora sociocultural, Carmen Guardado, profesora y escritora, y Marta Mori, escritora, directora de la revista Lliteratura y miembru de l’Academia de la Llingua Asturiana.
D’ente les 15 obres presentaes escoyeron trés finalistes de les que salió la obra ganadora, que suma a Mercedes Ruisánchez Gutiérrez a la llarga riestra d’autores premiaos, ente los que tán Taresa Lorences, Solinca Turbón, Miguel Rodríguez Monteavaro, Héctor Pérez Iglesias o Susana Sela.
Tres del actu celebróse un homenaxe nel cementeriu de Cadavéu, con llectura de testos del Padre Galo, participación del coru de Cadavéu, cantando temes con lletres del autor. El xuráu del premiu y dellos miembros de la Sociedá Popular La Regalina lleeron poemes del Padre Galo. El presidente del xuráu, Inaciu Galán, aprovechó l’actu pa lleer un poema de Xuan Bello y recordar el so venceyu sentimental y llingüísticu, pola so variedá familiar, con Fernán Coronas.
