L’espaciu Llaboral Centru d’Arte vuelve a acoyer esta fin de selmana una nueva edición de LABShop Mercáu d’Arte y Diseñu. Esti eventu bianual axunta dende 2008 a un nutríu grupu de creadores, diseñadores y editores independientes nun espaciu pensáu pa promocionar esti tipu d’actividaes. Amás del propiu mercáu y de la zona gastronómica, la programación de LABShop Primavera 2025 enllenará los díes 17 y 18 de mayu d’alderiques, talleres, esposiciones, recitales, música y baille.
Esta edición va cuntar con más de 60 puestos y ufiertará’l mayor númberu de propuestes participatives hasta la fecha con 25 talleres pa tolos públicos. Amás de la programación abierta hai un ampliu abanicu d’opciones que precisen inscripción, nel qu’inclúinse dende dende un Llaboratoriu de Ñarices con cata y creación d’arumes personalizaos, hasta talleres de colax o de cerámica collaborativa.
Programación
La xornada del sábadu 17 entama a les 11.00 con Escarabayando’l LABShop. UK Asturies y a les 12.00 tendrá llugar la mesa redonda Moces que creen n’Asturies. A les 13.30 tendrá llugar la sesión vermú al cargu de DJ Set Les Greques. A les 17.00 proyectaráse’l documental Que sirva de ejemplo, de Sofía Castañón, siguíu d’un alderique cola propia directora. Esti primer día de LABShop pesllará col conciertu del grupu Tigre y diamante a les 20.00.
El domingu 18 a les 12.00 David Acera ufrirá, nel espaciu Plat0, un cuentacuentos dirixíu al públicu nel sentíu más ampliu (de 5 a 105 años). Mentantu, Pau Santirso y María Vázquez tarán Baillando tradi na zona d’exterior. A les 12.30, Sofía Castañón impartirá’l taller La poesía nun da mieu nel espaciu de la biblioteca. La sesión vermú entamará a les 13.30, ambientada nesti casu por Dj Set Fañagüeta. La programación de la tarde entama a les 18.00 con un recital poéticu con DJ, Asturies y Galiza, voces y sones. Miriam Couceiro, escritora y socióloga gallega qu’esfruta esti mes d’una estancia na Residencia Lliteraria Xixón, compartirá esti alcuentru asturgalaicu con Sofía Castañón. Ciudadano Tinta sedrá quien ponga’l ramu a esta edición del LABShop primavera 2025 col conciertu que tendrá llugar a les 19.00 na zona exterior del mercáu.
A les actividaes descrites, que son totalmente gratuites hasta completar aforu, súmense dellos talleres pa los qu’hai qu’inscribise previamente, varies actividaes infantiles, el mercáu y la yá comentada zona gastronómica y de terraza. Pa ampliar esta información, consultar inscripciones a los talleres o saber más sobre les exposiciones y actividaes propuestes dientro de la programación LABShop primavera 2025, puen visitase les RRSS y la web de Llaboral Centru d’Arte.
