La Feria del Llibru de Xixón va celebrase esti añu del 13 al 19 de xunu, ente’l Paséu de Begoña y la cai Tomás y Valiente, xunto a la Plaza’l Parchís. La nueva etapa de la Feria del Llibru empecipiada en 2020 y llega a la so tercer edición col enfotu de siguir avanzando nun proyectu distintu al habitual nesti tipu d’eventos.
Acordies colo qu’espliquen los organizadores «La primer intención ye que’l programa cultural nun seya namás un complementu de l’actividá comercial alredor del llibru. Pretendemos ufiertar daqué distintu al encadenamientu de presentaciones de novedaes lliteraries o a la presencia de dos o trés robles llamatives que nun dexen más buelga que la so cobertoria mediática. Presentamos pa ello un programa diseñáu con un criteriu independiente de les novedaes editoriales o de les llistes de llibros más vendíos».
Ente los nomes que van presentar o lleer la so obra nesta feria, apaecen dellos n’asturianu, como María Esther García López, Inaciu Galán, Xaime Martínez, Alfredo Garay o Ramón Lluis Bande, ente otros. Amás, van tener caseta editoriales qu’editen n’asturianu, como Ediciones Trabe, Cuatro Gotes Ediciones, Impronta, Radagast, BaxAmar, Delallama, Pintar-Pintar y Hoja de Lata, ente otres.
