El próximu sábadu 26 d’abril va celebrase n’Uviéu la que va ser la primer edición del Festival «Voces del fornu», un eventu alredor de poesía escénica que va poner la capital asturiana na vanguardia de la lliteratura.
«Voces del Fornu» ye un festival nel que se va desenvolver una serie de recitales poéticos. Nél van participar poetes asturianos y poetes de fuera d’Asturies col oxetivu de dinamizar gracies a la poesía una ciudá qu’actualmente nun tien un festival de poesía de renome. «Voces del Fornu» preséntase dende’l so empiezu como una plataforma plurianual pa crear cohesión nel gremiu de poetes cola idea d’axuntar la nuestra comunidá lliteraria y coles mires de conectar el colectivu. Va buscase, igualmente, la máxima escelencia y calidá lliteraria al empar que la diversidá a tolos niveles: xeneracional, no tocante a sexu-xéneru, a idiomes con y sin Estáu, d’estilos lliterarios y enfoques de la práctica poética, favoreciendo así la pluralidá llingüística y l’atención a les minoríes llinguístiques y identitaries.
El 26 d’abril, a partir de les 19:00 hores, na plaza cubierta de Trescorrales, nel centru d’Uviéu, van dase cita los espectáculos poéticos que siguen. Dende Barcelona va llegar la poeta Míriam Reyes, que va presentar un recital de voz y música electrónica a partir del so últimu llibru Con, editáu por La Bella Varsovia. Los gallegos Silvia Penas y Jesús Andrés van traer a Asturies la so propuesta Cinta adhesiva un percorríu poéticu pola carrera de la renomada Silvia Penas. Pablo X. Suárez y Dudu García van presentar el so espectáculu El Velcro, una visión punk de la contemporaneidá asturiana. Pa poner el broche a la xornada l’artista Christina Rosenvinge va interpretar los sos Versos sáficos a dúu cola guitarrista Amaia Miranda. Esta actuación de Christina Rosenvinge va tar centrada nes lletres de los cantares y va ser una de les poques oportunidaes pa los sos siguidores asturianos de vela y escuchala n’Asturies.
Tol festival ta dirixíu pol poeta asturianu Miguel Rodríguez Monteavaro y ta patrocináu pola Fundación Minicipal de Cultura d’Uviéu, gracies a un fondu interés del conceyal de Cultura David Álvarez pola inclusión de la poesía contemporánea na candidatura d’Uviéu como Capital Europea de la Cultura en 2031.
