El xuráu destaca del trabayu galardonáu la cenciellez didáctica, los valores que tresmite y el so léxicu escoyío y curiao”
La obra La curuxa Catuxa, firmada por Vero Suari ya Inaciu Galán, foi galardonada col premiu María Josefa Canellada de lliteratura infantil y xuvenil n’asturianu na so decimotercer edición.
El xuráu quixo resaltar del trabayu de Suari y Galán que ye un exemplu de “cómo se llogra anovar una tradición del imaxinariu colectivu universal adaptándola a la cultura asturiana, n’una obra pa primeros llectores na que destaquen, dende la cenciellez didáctica cola que ta escrita, los valores firmes que tresmite, y un léxicu escoyío y curiao”.
Nesta edición, y so la presidencia del director xeneral de Política Llingüística, Antón García, el xuráu tuvo integráu pol alcalde de Cabranes, Gerardo Fabián, Alonso Zamora Canellada, familiar de María Josefa Canellada, los Alba Carballo ya Iris Díaz Trancho y Penélope Miranda, responsable del serviciu de Normalización Llingüística del conceyu de L.lena. Actuó como secretaria Juncal García Velasco, xefa de serviciu de de la Dirección Xeneral de Política Llingüística.
Vero Suari (Xixón, 1983), ye diplomada en xestión d’empreses turístiques y trabaya nel ámbitu de la información turística y cultural. Ye collaboradora de la revista Viaxast y de la plataforma VerAsturies.com.
Inaciu Galán (Xixón, 1986) ye periodista y escritor, diplomáu en Turismu y especialista en xestión cultural pola Universidá d’Uviéu, amás de profesor d’asturianu. Presentó programes de televisión. En 2005 recibió’l premiu Enriqueta González Rubín de periodismu.
