El conceyu de Corvera vuelve a organizar LLIBROS, la so Feria del Llibru, qu’esti añu pega l’espurrión y estiende la so programación con actividaes del martes 7 al sábadu 11 d’abril.
LLIBROS, la Feria del Llibru de Corvera, ye yá una cita anual obligada dientro del panorama lliterariu asturianu na so segunda edición. Trátase tamién d’ún de los eventos culturales de mayor sonadía nel conceyu, que paga atención especial al asturianu (como puede vese nel programa y nel propiu nome de la feria. LLIBROS) y qu’aprovecha’l potencial d’espacios como los teatros El Llar (Les Vegues) y La Lechera de Cancienes, ensin escaecer el Centru Sociocultural de Les Vegues. El mercáu lliterariu propiamente dichu va tar instaláu los díes vienres 10 y sábadu 11 na esplanada cercana al Parque d’Europa, xusto al llau del Teatru El Llar.
La programación de LLIBROS Corvera
La programación de LLIBROS trai a Corvera a autores y personalidaes del renome de Ángeles Caso, Pedro de Silva, Berto García, Pilar Sánchez Vicente, Alfonso Zapico, Benjamín Prado, Sofía Castañón, Xulio Vixil, Marta Mori, Francisco Priegue, Dolfo Camilo Díaz, Solinca Turbón, Xaime Martínez, Arantza Margolles Berán, Tito Montero o Beatriz Quintana Coro, ente delles otres otres.
Arriendes de l’actividá puramente lliteraria, tamién va haber homenaxes a Xuan Bello, Damián Barreiro y Ángel González; ensin escaecer la escena, porque tamién el teatru cabe nesta feria:
Saltantes Teatro va llevar a escena La balada del norte d’Alfonso Zapico’l vienres 10 a les 22.00h nel Teatru El Llar.
Hipnótica Circu Teatru va representar La Recadera de los Libros, un espectáculu interactivu de circu, cuentos y música, el sábadu 11 a les 13.00h nel Recintu/Carpa de los Llibros.
Amás de les presentaciones, actuaciones y talleres, la organización de la feria anima a les distintes casetes a organizar firmes de llibros col envís d’averar a públicu y autores. Ente los autores que van alcontrase colos y les llectores destaca’l corveranu Berto García, que xuega en casa y amás de participar en varios alcuentros lliterarios mientres los díes de la feria, va tar firmando la so obra Cinética y, de manera especial, Xera, de 18.15 a 18.45 hores na caseta de la llibrería La Pilarica. Tamién el vienres y na mesma caseta de la llibrería mierense vamos poder alcontranos col avilesín Francisco Priegue ente les 19.15 y les 19.45 hores, quien va firmar exemplares de Les verdaderes poses del home planta notru actu más dientro d’una xornada centrada na creación lliteraria actual en diálogu directu col públicu. Esti tipu de firmes sirven non sólo pa roblar les obres, sinon que funcionen como puntu d’alcuentru y contactu directu ente llectores y escritores, ufriendo una escusa perfecta pa conversar y conocese ente sí.
Nesta segunda edición de LLIBROS, la Feria del Llibru de Corvera consolida’l so crecimientu y gana pesu dientro de la programación cultural del conceyu. El mercáu lliterariu va cuntar con alredor de 14 casetes y va reunir tanto a autores consagraos como a voces nueves del panorama asturianu. La cita afítase asina como un espaciu de referencia pa la promoción de la lliteratura, con una programación diversa que s’estiende a lo llargo de dellos díes.
