La rellación ente la lliteratura gallega y l’asturiana vive un momentu duce. Caldía tamos más sollertes a lo que se fai más p’allá del Eo y tamién la vecina Galicia anda pendiente de nós. L’hermanamientu ente les dos comunidaes llingüístiques nun ye a cencielles una cuestión llóxica de prosimidá, sinón que vese emburriada dafechu por delles persones, entidaes y iniciatives que tienen pernidia la importancia de rellacionase culturalmente ensin llimitase al contestu xeográficu del idioma propiu. Nesi sen, parte importante de la culpa d’esti averamientu progresivu que vien dándose mientres los últimos años ye de la poeta y xestora cultural Yolanda Castaño, fundadora y directora del proyectu Residencia Literaria 1863 d’A Coruña, que convoca por quintu añu consecutivu la so beca pa escritores n’asturianu.
La Residencia Literaria 1983 convoca esti añu la V Residencia Asturies pa escritores n’asturianu y eonaviego o gallego-asturianu n’A Coruña. La beca, qu’inclúi’l desplazamientu, la estancia y un sueldu pa los gastos de manutención mientres la mesma, tá empobinada a sofitar la creación lliteraria nes llingües propies d’Asturies. La persona que resulte beneficiaria de la residencia va esfrutar d’una estancia de mes completu (del 1 al 31 d’avientu de 2025) nes instalaciones de la residencia, amás del sofitu y la promoción artística de la entidá y preferencia p’asistir a eventos y participar na bayurosa vida cultural coruñesa.
Les bases especifiquen que pudeen presentase autores que tengan polo menos un llibru publicáu y amás de la propuesta de proyectu, han d’unviase tamién un dossier lliterariu, una biobibliografía y una carta de motivación. Tola documentación va remitise per corréu electrónicu y el plazu d’inscripción acaba’l 31 d’agostu a les 22h.
Puedes atopar les bases completes de la V Residencia Asturies equí.
