La conseyera de Cultura, Política Llingüística y Deporte, Vanessa Gutiérrez, anunció esti xueves, nel marcu de la inauguración del Festival de Cultura Contemporánea La Favorita de Xuan Bello, en Ḷḷuarca (Valdés), que la Selmana de les Lletres 2027 va tar dedicada a Xuan Bello, en reconocimientu al so heriedu lliterariu, llingüísticu y cultural, espardiendo les actividaes a lo llargo de tol añu. La iniciativa, impulsada por Cultura, busca rindir homenaxe a quien foi una figura clave na lliteratura asturiana y ún de los autores más reconocíos internacionalmente.
La conseyera destacó que nun se trata namás de dedica-y el día o la Selmana de les Lletres, sinón d’articular una programación añal que ponga en valor la so obra, el so pensamientu y el so papel como creador y dinamizador cultural. “Xuan Bello enseñónos que la llingua ye un sitiu onde habitar. Nel 2027, Asturies va recordalu como merez: con un añu enteru de celebración de la so palabra”, señaló.
Xuan Bello (Paniceiros, Tinéu, 1965 – 2025)
Xuan Bello foi una de les voces más relevantes de la lliteratura contemporánea en llingua asturiana. Publicó’l so primer llibru de poemes con namás 16 años, Nel cuartu mariellu (1982), y desenvolvió una obra poética y narrativa fonda, con títulos como El llibru de les cenices, Los nomes de la tierra, El llibru vieyu (Premiu Teodoro Cuesta), Los caminos secretos y l’antoloxía billingüe La vida perdida. La so proyección nacional llegó con Hestoria Universal de Paniceiros, obra que recibió’l Premiu Ramón Gómez de la Serna y foi reconocida pola crítica como ún de los llibros más destacaos del 2003.
Amás d’escritor, foi traductor, articulista y dinamizador cultural. Cofundador de revistes como Adréi y Zimbru, collaboró en medios como La Nueva España, El Comercio y Les Noticies, del que foi director ocho años. Impulsó la Xunta d’Escritores Asturianos nel 2005 y traduxo a dellos autores portugueses.
Recuperación de la figura de Taresa Cónsul y homenaxe al teatru asturianu nel 2026
La conseyera Vanessa Gutiérrez tamién anunció que la XLVII Selmana de les Lletres Asturianes, que se va celebrar nel 2026, va tar dedicada a Taresa Cónsul, monxa benedictina del Monesteriu de Santa María de la Vega (Uviéu), nacida en Siero na década de 1750 y fallecida en 1834. Trátase de la primer muyer de nome conocíu qu’escribió teatru n’asturianu, autora d’un entremés representáu en 1789 y espublizáu la primer vegada en 1996.
Xunto a la recuperación de la so figura, la Selmana de les Lletres Asturianes va rindir homenaxe al teatru popular o teatru costumista asturianu, un xéneru que foi quién a afianzar un públicu propio y que caltién anguaño una vitalidá curiosa. La programación va dexar percorrer la historia de les artes escéniques n’asturianu dende’l sieglu XVII hasta l’actualidá, destacando’l procesu de profesionalización que vive’l sector. Al so afianzamientu ayuden iniciatives autonómiques como’l premiu y festival Nel Amaro o’l programa cultural Asturies Cultura en Rede.
La coordinación de la Selmana va tar al cargu d’Adolfo Camilo Díaz y Laura Iglesia, dos referentes del ámbitu teatral asturianu.
Avances na declaración del teatru costumista como BIC
L’homenaxe al teatru asturianu enmárcase nel espediente en cursu pa declarar el teatru popular asturianu como Bien d’Interés Cultural (BIC) de calter inmaterial. La iniciativa, incoada por resolución de la Conseyería de Cultura, Política Llingüística y Deporte en febreru del 2025, dispón yá d’informes favorables de la Universidá d’Uviéu, el RIDEA y la Real Academia de la Historia.
L’espediente destaca’l valor del teatru asturianu como fenómenu escénicu y movimientu sociocultural singular, con más de cien años de vixencia, una vinculación fuerte cola sociedá asturiana, y un papel clave nel caltenimientu de la llingua asturiana.
Estes acciones formen parte d’una estratexa cultural que prioriza l’equilibriu territorial, la promoción de les llingües propies d’Asturies y l’accesu universal a la cultura como derechu. El Festival La Favorita que s’inauguró güei en Ḷḷuarca, que tien una inversión de más de 14.000 euros del Principáu, ye exemplu d’esta política, que nel 2025 destinó más de 700.000 euros a sofitar 44 festivales en toa Asturies.
