Marina Pangua llevó’l Premiu Xosefa Xovellanos de Novela n’asturianu, que convoca la Conseyería de Cultura, Política Llingüística y Deporte, cola obra Bisarma. El xuráu destacó “la construcción narrativa trabayada, a partir de la sonoridá y la métrica, d’una historia intimista escrita con finura y sutileza y de tresfondu social grande”, remarcando amás el “calter renovador d’una obra que vincula a la lliteratura asturiana coles tendencies contemporánees de la novelística europea”. Esti gallardón autonómicu ta dotáu con 6.000 euros, un troféu y la publicación de la obra ganadora.
El xuráu d’esta 46 edición del premiu presidiólu la xefa del Serviciu de Planificación y Normalización Llingüística, Juncal Mónica García Velasco, y integráronlu cinco espertos en lliteratura asturiana: Natalia González Menéndez, Ismael González Arias, M.ª Ángeles García Rodríguez, María Cueto Fernández y Gonzalo Llamedo Pandiella.
Marina Pangua Cuesta (Uviéu, 1992)
Marina Pangua ye graduada en Llingües Modernes y les sos Lliteratures, ye profesora de francés en Secundaria y formó parte de proyectos musicales como Verdasca, el colectivu Muyeres o’l grupu La Ciudá del Mar. Nel pasáu añu 2024 llogró’l I Premiu Muyer de Narraciones Trabe cola obra coral Pel norte n’El Cantu Llunada, la so primer obra publicada.
