Sofía Castañón gana’l XXXI Premiu Xuan María Acebal de poesía n’asturianu cola obra ‘Esti amor asturfalante’

La Conseyería de Cultura, Política Llingüística y Deporte escoyó’l poemariu Esti amor asturfalante, de la escritora Sofía Castañón, como ganador de la XXXI edición del Premiu Xuan María Acebal de poesía n’asturianu.

El xuráu destacó “la madurez de la obra, la so capacidá de conmover y remover emociones, un usu del asturianu especialmente cuidáu y la solvencia na estructura d’un poemariu nel qu’una historia d’amor, una historia sobre’l llinguaxe y un contestu afectáu pel mundu entetéxense nun testu con versos d’aliendu llargu”.

El director xeneral d’Acción Cultural y Normalización Llingüística, Antón García, presidió l’equipu de persones espertes encargaes de valorar les obres, que tuvo integráu pola filóloga Iris Quintana y los poetes Taresa Lorences, Alba González Sanz, Rodrigo Olay y Miguel Rodríguez Monteavaro, esti últimu ganador de la edición pasada. Actuó como secretaria Laura Marcos, filóloga de la conseyería. Sofía Castañón algamaba asina’l XXXI Premiu Xuan María Acebal de poesía n’asturianu, confirmando que ye una poeta de referencia y una figura a siguir tamién dientro del panorama cultural asturianu.

El premiu Xuan María Acebal que promueve la Conseyería de Cultura, Política Llingüística y Deporte ta dotáu con 6.000 euros y la publicación de la obra ganadora.

Sofía Castañón (Xixón, 1983) ye escritora y realizadora audiovisual. Nel 2006 ganó’l premiu Asturies Xoven de Poesía con Animales interiores (Trabe, 2007) y nel 2009 consiguió’l Nené Losada Rico con Tiempu de render (Trabe, 2010), un poemariu n’asturianu escritu nel tiempu que pasó na Residencia d’Estudiantes al consiguir la beca de creación del Conceyu de Madrid. Dende entós, escribió y publicó varios poemarios y collabora con medios de comunicación asturianos, como La Nueva España, El Comerciu o La Voz d’Asturies, y d’ámbitu estatal, como El Huffington Post, eldiario.es, Diagonal o Climática.

Nel terrenu audiovisual destaca’l so llargumetraxe documental Se dice poeta (2014), sobre’l panorama poéticu contemporaneu dende la perspectiva de xéneru. Nel 2021 robló’l so segundu documental Que sirva de ejemplo.