El próximu vienres 24 d’ochobre de 2025 a les 19,00h arranca la cuarta edición del Ciclu de poesía QED, un conxuntu de recitales poéticos qu’un añu más va desenvolvese nel Salón d’Actos de la Biblioteca d’Asturies “Ramón Pérez de Ayala” (El Fontán, Uviéu) a lo llargo de la seronda. El Ciclu de poesía QED, coordináu pol poeta Miguel Rodríguez Monteavaro (Premiu Xuan María Acebal de Poesía 2024), cuenta col apoyu de la Conseyería de Cultura, Política Llingüística y Turismu del Principáu d’Asturies.
El QED (Quod erat demonstrandum) sigue fiel al so oxetivu d’axuntar les voces poétiques d’Asturies coles d’otres llingües y territorios, creando un espaciu de diálogu lliterariu y d’intercambiu cultural que s’estiende más allá de les fronteres asturianes. Como n’ediciones anteriores, el ciclu pretende ser un puntu d’encuentru ente xeneraciones, estilos y tradiciones poétiques, apostando pola calidá, la diversidá y la vitalidá de la palabra viva. Les yá habituales tres sesiones de recitales que conformen cada edición del QED van tener esti añu un ramu especial cola presentación de la primer antoloxía poética n’edición billingüe asturianu/portugués.
El diseñu de la cartelería y la imaxe de marca d’esta cuarta edición del festival vuelven a ser obra del artista gráficu Diego Estebo. A continuación, cartelu de la primer sesión y el programa completu d’esta IV edición del Ciclu de Poesía QED.
Vienres 24 d’ochobre – 19,00 h. Biblioteca «Ramón Pérez d’Ayala» (Uviéu)
Esta primer sesión sigue fiel al espíritu del Ciclu de poesía QED, buscando (y alcontrando) un equilibriu ente lo llocal y lo global, con tres autores que van ufrir propuestes bien distintes. Una autora imprescindible y referente de la poesía asturiana de los últimos años, otru más mozu que yá lleva más de media vida dedicándose al espardimientu de la poesía (mesmo n’asturianu qu’en castellanu) y una voz trillingüe orixinaria d’Iraq.
Ángeles Carbajal – Una de les voces más reconocíes de la poesía asturiana contemporánea, con una trayectoria sólida que combina sensibilidá, precisión verbal y un fondísimu conocimientu de la tradición lliteraria asturiana y española. Ganadora del Premiu Xuan María Acebal de Poesía en dos ocasiones.
Diego Solís – Poeta xixonés, de tonu íntimu y reflexivu, autor de poemarios onde la memoria y la ironía dialoguen con una visión crítica de la modernidá. Ganador del Premiu Asturias Joven de Poesía en dos ocasiones.
Abdul Hadi Sadoun – Poeta y traductor iraquí residente n’España, con una obra trillingüe (árabe, español y inglés) que trata la identidá, l’exiliu y la comunicación ente cultures. Ye ún de los poetes más reconocíos del so país.
Vienres 14 de payares – 19,00 h. Biblioteca «Ramón Pérez d’Ayala» (Uviéu)
Esta sesión va axuntar a dos poetes asturianos, bien estremaos ente sigo, con una autora india de talla mundial. Raúl Alonso ye poeta y periodista, con una obra marcada pol Premiu Asturias Joven de Poesía. Alfredo Garay, escritor y poeta asturianu con una voz heterodoxa y un llinguaxe cargáu d’imaxinación ye conocíu pola so participación activa nel movimientu poéticu d’Asturies y por ganar el Premiu Teodoro Cuesta de Poesía. Reshma Ramesh ye una poeta y médica india, reconocida internacionalmente pola so fonda espiritualidá y lirismu, traducida a múltiples idiomes y presente en festivales de poesía d’alredor de tol mundu. Escribe n’inglés y canarés.
Vienres 12 d’avientu – 19,00 h. Biblioteca «Ramón Pérez d’Ayala» (Uviéu)
La última de les tres sesiones combina talentu emerxente y valor consagráu d’Asturies con una de les figures más renomaes de Xapón. Diego García Riesgo, poeta y filólogu, acaba de publicar la so primer obra cola Editorial Trabe. Taresa Lorences ye profesora y poeta, con una trayectoria destacada na investigación y divulgación de la llingua asturiana amás d’una de les voces con más personalidá del Segundu Surdimientu. Yashuhiro Yotsumoto, poeta xaponés residente n’Alemaña, ye una de les voces más internacionales de la poesía contemporánea asiática, con una obra que combina ironía, humor y reflexión sobre la globalidá y la identidá.
Sábadu 13 d’avientu – 13,00 h. Casa de Cultura de Grau
Presentación del llibru Para além dos glaciares e dos cemitérios de sóis. Antologia de poesia asturiana comtemporânea (Editorial Officium Lectionis). Col traductor Jorge Melícias, l’editor José Rui Teixeira, voces destacaes de la poesía y la crítica portuguesa, y Fernando Álvarez Balbuena, filólogu espertu en llingües romániques, que van presentar la primer antoloxía n’edición billingüe asturianu/portugués.
