Los díes 22, 23 y 24 d’ochobre va celebrase n’Uviéu l’Alcuentru Internacional de Lliteratura Asturiana (AILA 2025). El Campus d’l Milán de la Universidá d’Uviéu (Uniovi) va ser l’escenariu principal d’unes xornaes enteramente dedicaes al estudiu y promoción de la lliteratura asturiana con una programación bien amplia qu’inclúi homenaxes, conferencies, meses redondes y hasta un recital de poesía.

El primer eventu dientro del AILA 2025 va celebrase esti miércoles 22 d’ochobre nel Aula Severo Ochoa del Edificiu Históricu de la Universidá d’Uviéu. L’actu inaugural inclúi la presentación de les xornaes y un homenaxe a Xuan Bello, poeta y personaxe pivotal de les lletres asturianes fináu prematuramente a finales d’esti mesmu xunetu de 2025.

El xueves 23 d’ochobre les actividaes tresllándense al Departamentu de Filoloxía Española del Campus d’El Milán, a partir de les 10h. Les conferencies, meses redondes y charres van ocupar tola xornada, con poses pa descansu y pa xintar. Estos actos entamen con una conferencia inaugural sobre’l los futuros de la lliteratura asturiana, al cargu de Martín López-Vega (Instituto Cervantes). El restu de la mañana y parte de la tarde van dedicase a la crítica testual con Andrea Bresadola (Università di Macerata) y Xuan Carlos Busto Cortina (Universidá d’Uviéu). Tres de la posa pa xintar, continuaráse con una mesa redonda al rodiu de la edición crítica n’Asturies, con Rodrigo Olay Valdés (Universidá d’Uviéu), Xaime Martínez (Universidá d’Uviéu) y Adrián Martínez Expósito (Universidá d’Uviéu). Depués, tocará-y a la revisión de la historia de la lliteratura asturiana con una conferencia de Marta Mori (Academia de la Llingua Asturiana) y Denis Soria sedrá quien pieslle la xornada con una charra sobre lliteratura d’Uviéu.

El vienres 24 l’actividá continúa nel mesmu departamentu del Campus d’El Milán a partir de les 10h. La mañana va dedicase a la lliteratura gallego-asturiana con Lucas Vega Vilabrille (Uniovi) y a la traducción, incluyendo una charra de Carles Biosca Trias (Universitat Autònoma de Barcelona) mesa redonda con Rafa R. Valdés (Ediciones Trabe), Aymara González Montoto (Verbéu) y Miguel Fernández Díaz (Uniovi), amás de la presentación del proyectu de visibilización y promoción lliteraria Asturian Writers con Patricia Suárez (Uniovi) y Aníbal González (Uniovi). Les actividaes de la tarde van centrase na teoría y crítica lliteraria, con una mesa redonda na que participarán José Luis García Martín (Universidá d’Uviéu), Guillermo Sánchez Ungidos (Universidá d’Uviéu), Berta Piñán (Centru Pen Asturianu), amás d’una conferencia por Paquita Suárez Coalla (The City University of New York).

El ramu a estes xornaes de lliteratura asturiana va ponelu la primer sesión del IV Ciclu de Poesía QED, eventu que coordina Miguel R. Monteavaro (Uniovi, Asturian Writers). L’actu, que va tener llugar a les 19h del mesmu vienres 24, tresllada l’actividá a la Biblioteca Pública Ramón Pérez de Ayala y inclúi la participación de dos poetes d’Asturies como son Ángeles Carbajal y Diego Solís, amás de cuntar cola presencia del autor iraquí Abdul Hadi Sadoun.

L’AILA 2025 establezse con esta programación como una cita académica imprescindible pa los estudios lliterarios asturianos, dedicándose a la propia lliteratura ensin zarrar puertes a la internacionalización de la mesma. Persones de varios países van axuntase con dalgunes de les persones más relevantes dientro de les lletres asturianes nunes xornaes que ñacen de la vocación de mirar pa sigo ensin perdese nel propiu embelicu, de deprender y d’enseñar, d’estudiase y d’estudiar ensin facese de menos. Porque la lliteratura asturiana ye y tien que ser eso: un sistema lliterariu al mesmu nivel que cualquier otru, colos sos estudios propios, los sos propios referentes y la voluntá de salir fuera del so propiu territoriu (y de volver a él).

L’asistencia a les xornaes ye llibre hasta completar aforu, con inscripción de baldre y posibilidá de certificar l’asistencia rellenando’l formulariu d’esti enllaz.

Artículos venceyaosMás del autor