El conceyu de Riosa anuncia un recital poéticu contra la violencia machista al rodiu del Día Internacional pa la Eliminación de la Violencia contra la Muyer. La cita va celebrase’l xueves 27 de payares na Casa la Cultura de Riosa y nella van axuntase cuatro poetes bien distintes, de xeneraciones y estilos bien variaos. Marta Mori, Sofía Castañón, Solinca Turbón y María Abril van ser les cuatro muyeres que garren la pallabra pa compartir los sos versos col públicu asistente a esti recital contra la violencia machista.
Marta Mori d’Arriba (Xixón, 1965) ye llicenciada y doctora en Filoloxía Hispánica, miembru de númberu de l’Academia de la Llingua Asturiana y catedrática de Lengua Castellana y Literatura nel IES Xovellanos de Xixón. Ye directora de la revista Lliteratura y foi ganadora de los premios Teodoro Cuesta y Xuan María Acebal de poesía, ente otros reconocimientos.
Sofía Castañón (Xixón, 1983) ye escritora y realizadora audiovisual. Ganó’l premiu Asturies Xoven de Poesía, el Nené Losada Rico y ta acabantes de recibir el Xuan María Acebal. Tamién collabora con medios de comunicación asturianos, como La Nueva España, El Comerciu o La Voz d’Asturies, y d’ámbitu estatal, como El Huffington Post, eldiario.es, Diagonal o Climática.
Solinca Turbón (Llangréu, 1981) ye llicenciada en sicoloxía y Máster en Xestión Integrada d’Empreses, pero ye más conocida na lliteratura asturiana pola so faceta de poeta. Ganó premios como’l Nené Losada Rico y el Fernán Coronas. En narrativa, algamó varios reconocimientos en concursos de rellatos. Turbón ye tamién miembru activu de la tertulia lliteraria Malory, del Sindicatu d’Autores Llangreanos (SAL) y de l’asociación d’escritores Tinta Astur.
María Abril (Mieres, 1992) ye graduada en Llingua Epañola y les sos Lliteratures con tesis doctoral sobre Benito Jerónimo Feijoo. Anguaño dedícase a la docencia y trabaya como profesora d’institutu, anque nun escaez la so pasión pola producción lliteraria. Arriendes de la so faceta d’investigadora, Abril algamó premios como’l Asturies Xoven de Poesía, el concursu lliterariu d’Uniovi y más recién, un accésit del Premiu Adonais de poesía.
