El conceyu de Tinéu, al traviés de la Conceyalía de Cultura y la Casa la Cultura de Navelgas, entama los preparativos de la VI Feria del Llibru nel Mundu Rural que va volver a celebrase na localidá de Navelgas.
El sábadu 16 de mayu van tener llugar los actos principales d’esta sesta edición, cola participación de mediu centenar d’escritores, editoriales y puestos institucionales que van esponer les sos publicaciones en diferentes casetes pa la venta y firma d’exemplares.
Como novedá, esta edición va ser la primera na que la feria ocupe’l día completu del sábadu (mañana y tarde), ufriendo un horariu de visita más ampliu. Arriendes d’ésto, hai organizaes delles otres actividaes los díes 14, 15, 16 y 17 de mayu: presentaciones de llibros, alcuentros con autores, recitales poéticos, cuntacuentos pal públicu infantil, llectures públiques y actuaciones musicales. Amás, va haber reconocimientu especial pa la entidá cultural y l’autor del añu; tamién ta previstu un homenaxe al escritor Xuan Bello, tristemente fináu en xunetu del 2025.
La Casa la Cultura de Navelgas ye’l departamentu municipal encargáu de la organización d’esta feria que yá ye referente dientro de los eventos rellacionaos col sector llibreru y cultural d’Asturies.
El programa definitivu va ser fechu públicu a finales del mes d’abril.
GREMIU D’EDITORES, ASOCIACIÓN D’ESCRITORES D’ASTURIES Y UNIVERSIDÁ D’UVIÉU
Destaca la participación na feria del Gremiu d’Editores d’Asturies col so presidente, Daniel Álvarez, a la cabeza. Tamién l’Asociación d’Escritores d’Asturies va tar representada con una quincena d’escritores asociaos y la participación de la so presidenta Esther García López. Amás, l’eventu vuelve a cuntar, mesmo qu’en toles ediciones anteriores, cola participación del Serviciu de Publicaciones de la Universidá d’Uviéu.
ACTUACIONES MUSICALES
El músicu brasileñu Vaudí va poner el ramu a esta VI Feria del Llibru de Navelgas con una actuación prevista pal sábadu 16 a les 20 hores. Esta actuación ta patrocinada pola Fundación Automáticos Tinéu pal fomentu de la cultura.
PANLLIBRU
Amás, na inauguración de la feria desvelaráse’l Panllibru de la presente edición. Trátase d’ún de los actos más orixinales del eventu nel que’l llibru más destacáu del añu (esocoyíu polos y les llectores de la Biblioteca de Navelgas), introduzse nuna fogaza de pan. El conteníu, el Panlllibru del añu, va ser desveláu al abrise la fogaza énte’l públicu asistente.
