El 23 d’abril de cada añu festéxase en tol Mundu’l Día Internacional del Llibru, y la Rede de Biblioteques Municipales d’Avilés celébralu cola convocatoria del so Concursu de Microrrelatos, que yá va pela la sesta edición. Les cuatro categoríes son: de 6 a 8 años, de 9 a 12, de 13 a 18 y mayores de 18 años. El plazu de presentación de les obres conclúi’l llunes 31 de marzu a les 23.59 hores.
Les obres lliteraries que se presenten a esti VI Concursu de Microrrellatos pol Día del Llibru de la Rede de Biblioteques Municipales d’Avilés tienen que ser orixinales, inédites y non premiaes con anterioridá. Van almitise obres escrites mesmo en castellán que n’asturianu, colos siguientes requisitos:
- Los rellatos tienen que contener la palabra «llibru».
- La estensión máxima permitida ye de 200 palabres, títulu incluyíu.
- La redacción de les obres tien que facese usando un procesador de testos compatible con Microsoft Word, lletra Times New Roman, tamañu 12 y interlliniáu simple.
- La presentación de los trabayos va realizase per corréu electónicu a mtpasarin@aviles.es indicando nel asuntu VI CONCURSU DE MICRORRELATOS DÍA DEL LLIBRU. El corréu tien qu’incluyir dos documentos axuntos: ún que contenga’l microrrelatu y el nomatu; y otru qu’incluya los datos personales del autor o autora, títulu del microrrelatu, nomatu, nome y apellíos reales, edá, categoría a la que se presenta, dirección postal, teléfonu y dirección de corréu electrónicu.
El fallu del xuráu va facese públicu’l mesmu 23 d’abril y van concedese cuatro premios, ún pa cada categoría, consistentes en llotes de llibros.
Nes bases establezse que los autores y autores de les obres ganadores y finalistes ceden los derechos de reproducción y comunicación pública de les obres a la organización, que va poder facer usu de les mesmes como considere, incluyendo la posibilidá de publicación, faciendo constar siempres l’autoría. Esta cesión nun va conllevar remuneración económica dala.
Les bases completes puen consultase equí.
