El 23 d’abril ye’l Día Mundial del Llibru, como ye bien sabío, pero n’Asturies celébrase d’un mou mui especial. Esti añu la celebración de San Xurde, Día del Llibru n’Asturies, confirma una tradición nueva que yá va enraigonando na cultura asturiana dende l’entamu.
L’añu 2025, el Gremiu d’Editores d’Asturies en xuntanza col Gobiernu del Principáu d’Asturies y los sectores de la panadería y pastelería, la confitería artesana, la producción de miel, el comerciu, les biblioteques públiques y les llibreríes asturianes propunxeron da-y una forma nueva a dos tradiciones (la del santu caballeru y la del Día del Llibru). Taba pernidio qu’había que venceyar dambes festividaes, aprovechando la coincidencia nel calendariu. Esto fíxose vinculando’l fomentu de la llectura cola lleenda de San Xurde y l’aporte del sector gastronómicu foi un productu creáu a costafecha pa esti día siguiendo recetes tradicionales de la nuesa tierra.
LA LLEENDA DE SAN XURDE Y EL DRAGÓN
Dende’l sieglu IX, la hestoria de cómo San Xurde mató a un dragón dio orixe a innumberables cuentos populares europeos. La versión escoyida nesti casu básase en delles lleendes que rellacionen al santu caballeru col cuélebre, la criatura mitolóxica asturiana. Quiciás la más conocida seya la de Zalón (Ayande), onde cuéntase que San Xurde, ayudáu por unos monxos martirizaos pol culiebrón, preparó una rosca de pan enllena d’alfileres y piedres en caldia qu’aventó a la boca de la bestia mientres-y clavaba una llanza.
PRODUCTU DE CERCANÍA Y RAIGAÑU
La cercanía y el ciñu pola cultura y la tradición asturiana son los finxos que vertebren esta asociación del ámbitu llibreru colos sectores artesanales de la panadería, pastelería, confitería y productores de miel con Indicación Xeográfica Protexida (IXP). Sectores toos ellos necesariamente de proximidá mesmo que’l mundu del llibru asturianu, si lu entendemos atendiendo a les característiques del ecosistema cultural de la nuesa tierra. Nesi sen, la collaboración intersectorial nun ye sólo una ocurrencia pa dinamizar el comerciu sinon que bebe de la lleenda de San Xurde, reinterpretándola pa ufrir un rellatu nuevu y contemporaneu afitáu nestes dos tradiciones que coinciden el mesmu día del añu.
EL CUÉLEBRE COMO METÁFORA
La lleenda tien un potencial bien granible pal imaxinariu colectivu: cuélebres, caballeros y pelees a muerte pa llibrar al mundu del mal son elementos clásicos de la lliteratura épica y de fantasía. Pero l’aprovechamientu de la lleenda de San Xurde tien una interpretación más profunda: el cuélebre puede lleese simbólicamente como un mal tarrecible qu’arrampla con tolo qu’alcanza, una fuercia superior que torga les vides de quienes cayen nel so influxu. Esa fuercia maligna ye la inorancia y la cura, la lliteratura; amás, nesta reinterpretación son les persones afectaes por esi mal, quienes tomen la rosca pa sí y aliméntense asina xustamente cola ferramienta pa finar l’amenaza (el llibru y el pan van de la mano, alimentu pa la mente y pal cuerpu, que son dos partes d’una mesma unidá, que ye la persona).
ANIMÁMOSTE A QU’ESTI 23 D’ABRIL TE SUMES AL ESPOXIGUE D’UNA TRADICIÓN REGALANDO UN LLIBRU Y UNA ROSCA DE SAN XURDE
