Les lletres asturianes viven un momentu duce a nivel creativu y parte de la culpa d’esto tiénenlu les munches iniciatives públiques y privaes que premien a los y les autores que s’animen a participar coles sos obres en dalgún de los concursos que se convoquen.
Premios lliterarios: variedá y prestixu
A los seis premios lliterarios de carácter añal que convoca la Conseyería (novela, poesía, narrativa infantil y moza, ensayu, testos teatrales y cómic) súmense otros yá bien afitaos y de prestixu reconocíu. Ente ellos pueden destacase dalgunos de poesía como’l Teodoro Cuesta de Mieres o el Fernán Coronas de la Sociedá La Regalina, los de rellatu breve pola oficialidá de Bimenes y Fernández Lema de Valdés, el Yolanda Huergo d’investigación de l’Asociación Grana, el Pepe Campo de monólogu de la Sociedá Humanitarios de San Martín o l’Andrés Solar de novela curtia qu’organiza’l conceyu de Xixón, ente otros.
El concursu del que venimos a falar güei organízalu una editorial, Ediciones Trabe, que col oxetivu de favorecer y promover la creación lliteraria n’asturianu d’autoría femenina convoca una nueva edición del Premiu «Muyer» de Narraciones Trabe. Van poder optar al premiu «Muyer» toles muyeres interesaes, d’edá adulta, con obres de narrativa escrites n’asturianu, yá sían noveles, recopilaciones de cuentos o cualesquier otra forma posible de narración ficcional. Cada autora puede presentase namás con un orixinal y si ye ganadora nun pue presentase al otru añu.
Muyeres y actualidá lliteraria
Esti Premiu «Muyer» de Narraciones Trabe, que yá va pela so tercer edición, busca fomentar la creación lliteraria fecha por muyeres mesmo que’l so reconocimientu. Un reconocimientu yá va viéndose medrar tamién n’otros premios que tradicionalmente teníen una nómina de ganadores con un desequilibriu bien evidente que basculaba hacia los homes. Llamémoslo pol nome patriarcáu, falemos de criterios poco paritarios o reconozamos la dificultá de conciliación ente los trabayos de cuidaos, los trabayos productivos y el llabor creativu; seya polo que seya o por too xunto, una güeyada rápida a les llistes de ganadores puede danos una idea pernidia de la situación. Sicasí, nos últimos tiempos esto ta camudando y nel 2025 la presencia femenina foi más visible nos premios de mayor sonadía del panorama lliterariu asturianu: Sofía Castañón, Marina Pangua Cuesta, Iris Díaz Trancho, Marián García (xunto a Xurde Fdz.), Claudia Gutiérrez Lueje y Mercedes Ruisánchez algamaron toes elles reconocimientos d’ente los más consideraos y meyor premiaos.
L’autora Marta Mori pudo esfrutar a finales del añu pasáu d’otru reconocimientu distintu al de los premios que yá tien ganao: la oportunidá de desenvolver la so actividá como escritora nun entornu y condiciones óptimes cola Beca Residencia Asturies d’A Coruña que coordina la poeta gallega y Premiu Nacional de Poesía del Estáu español, Yolanda Castaño.
Si vimos que 2025 foi un añu decisivu pal reconocimientu de la lliteratura escrita por muyeres, l’añu 2026 entamaba cola noticia de que Berta Piñán va recibir el mayor reconocimientu a la carrera lliteraria dientro de les lletres asturianes, el Premiu Nacional de Lliteratura que yá ganaren primero Lourdes Álvarez en 2023, Xuan Xosé Sánchez Vicente en 2020 y Xuan Bello en 2017. Toes estes noticies vienen a ilustrar y afitar el fechu, bien nidiu, de que les muyeres tán ganando por méritu propiu los espacios que-yos pertenecíen dafechu dende va cuantayá: paecen bonos tiempos, nesti sentíu, pa la lliteratura de nueso.
Sobre’l III Premiu «Muyer» de Narraciones Trabe
La tendencia que tamos viendo (o que queremos ver) hacia la equidá na lliteratura afítase nel exemplu d’inciatives como’l Premiu «Muyer» de Narraciones Trabe, proyectos qu’animen a envalorar la creación lliteraria y el puxu artísticu de les muyeres xustamente nun momentu históricu nel que paez que la deriva política global tira más pa la regresión que pal progresismu. Ello ye qu’esto nun ye sólo un premiu, nin siquieramente queda nuna declaración d’intenciones: esti premiu supón otru referente pa munches muyeres que tienen muncho que cuntar, que saben cuntalo y que gracies a la posibilidá d’algamar un reconocimientu d’esti tipu, quiciás decidan llanzase y asina les nueses lletres puedan beneficiase de tolo que tienen pa ufrir.
Pongamos por casu autores yá reconocíes como Marina Pangua Cuesta o Arantza Margolles Beran, ganadores del I y II edición respectivamente coles obres Pel norte n’El Cantu Llunada y Santo Amaro, dambes dos referentes culturales indiscutibles d’Asturies por dellos (y distintos) motivos.
Presentación al III Premiu «Muyer» de Narraciones Trabe
El plazu de presentación d’orixinales ta abiertu dende’l pasáu 23 d’abril del 2026 a les 00:00 h al 31 d’agostu a les 23:59 h. Pueden consultase les bases completes en: https://www.trabe.org/iii-
Dende Formientu queremos animar a toles muyeres con interés na creación lliteraria n’asturianu a presentase a esti concursu (y non sólo a esti, por supuestu, ¡hai que dir a por too!).
