L’Institutu Asturianu de la Mocedá, que convoca cada añu varios reconocimientos al méritu artísticu dientro del «Programa Culturaquí», anuncia qu’amplíase’l plazu pa presentase a la edición de 2025 de los premios Asturies Xoven de lliteratura, nes estayes de Poesía, Narrativa y Testos Teatrales, hasta’l 17 de setiembre.
El «Programa Culturaquí» ta pensáu para ufrir a la mocedá asturiana la posibilidá d’atopar una vía pa desendolcar la so creatividá en distintes disciplines artístiques. Trátase d’una plataforma que busca premiar a xóvenes creativos y creatives de mou que tengan una oportunidá d’algamar reconocimientu del públicu en xeneral y tamién de los medios especializaos. Estos premios, qu’inclúin artes plástiques, música y lliteratura, supunxeron un pasu importante nos anicios de la so carrera artística pa figures de reconocíu prestixu nel panorama cultural d’anguaño como Ricardo Menéndez Salmón, Pablo Rodríguez Medina, Sofía Castañón, Jon Bilbao, Sergio Fanjul, Noemí Iglesias Barrios, Diego Solís o María Fernández Abril.
La principal base desta llinia de concursos vien determinada pola edá másima permitida: pueden participar les persones xóvenes ñacíes o residentes n’Asturies o descendientes hasta segundu grau de persones emigrantes asturianes, siempres que la so edá nun supere los 35 años a 31 d’avientu de 2025.
Nel casu de los concursos lliterarios, que son los afectaos por esta ampliación de plazu, almítense obres mesmo en castellán que n’asturianu. La inclusión del gallegu d’Asturies (o eonaviegu) nun apaez esplicitada na convocatoria, anque n’años anteriores sí s’almitíen obres na llingua del Eo-Navia.
El restu d’información sobre les bases ta disponible nesti enllaz.
