El Club Xeitu llanza una nueva convocatoria del Concursu de Recoyida de Toponimia ‘Concha de Lama’, qu’esti añu algama la so docena edición. Cola iniciativa, que cada añu cunta cola collaboración del Institutu Lleonés de Cultura, pretende aguiyase la participación pública na escoyeta y salvaguarda d’esta caña del patrimoniu inmaterial, animando a fcaelo a vecinos y naturales de L.laciana, Babia, Lluna, Omaña, Alto Sil y les zones estremeres asturianes que toma.
Plazu de presentación hasta’l 1 de setiembre
Según disponen les bases, que pueden consultase íntegres na web www.xeitu.es, van poder participar trabayos de cualesquier de los pueblos de los conceyos de Vil.lablinu, Murias de Parés, Riello, Valdesamario, Sotu y Amío, Pandorial del Sil, Palacios del Sil, San Emiliano, Cabrillanes, Sena de Lluna y Los Barrios de Lluna (provincia de Llión) y La Somiedu, Cangas del Narcea y Degaña (Asturies). Nellos, l’autor o autores han arrexuntar cuantos topónimos puedan ser recoyíos nun llistáu, mapes, ortofotos y elementos similares, a criteriu de cada autor.
El premiu tien una dotación económica de 500 €, amás de la publicación de la obra ganadora na serie ‘Toponimia’ del Club Xeitu. El plazu de presentación d’orixinales ta abiertu hasta’l 1 de setiembre, y el fallu del xuráu, que va tar compuestu por persones venceyaes a la temática, va ser fechu públicu antes del 15 d’ochobre de 2024.
