Col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, y embaxo’l patrociniu del Conceyu d’Avilés, entama’l XIV Concursu de microrrellatos «L’Horru del Carbayedo», nel que pue participar cualesquier escritor/a en llingua asturiana, como muncho con dos rellatos orixinales, nun s’almitiendo los presentaos n’ediciones anteriores.
Los rellatos nun puen pasar de les 500 pallabres. La temática ye llibre, pero la redaición tendrá que respetar les normes ortográfiques y gramaticales marcaes pola Academia de la Llingua Asturiana.
El plazu pa presentalos va pesllase a les 14 hores del martes, 1 d’avientu. La presentación pue facese namás per corréu lletrónicu, unviando los rellatos en formatu Word a: avvelhorreo@yahoo.es . Los trabayos dirán encabezaos con un títulu y firmaos namás con un nomatu. Nel corréu lletrónicu axuntaráse un archivu aparte, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.
El concursu tien premios de 500 euros y troféu y 300 euros y troféu. Los dos premios nun pueden recayer nel mesmu autor/a, pagaránse per tresferencia y, por llei, tarán suxetos a retención d’IRPF.
El vienres, 4 d’avientu, un xuráu formáu por persones rellacionaes coles lletres asturianes y la normalización llingüística, determinará los trabayos ganadores. El vienres, 18 d’avientu, los/les autores lleerán los rellatos premiaos y recoyerán los trofeos, a les 19 hores nel auditoriu de la Casa la Cultura d’Avilés. Tolos rellatos presentaos, premiaos o non, van esponese al públicu presentaos en paneles afayadizos ente’l 9 y el 18 d’avientu na Casa la Cultura d’Avilés.
