La Sociedá La Montera ta acabante d’espublizar les bases pa la participación nel so concursu lliterariu n’alcordanza de Manuel d’Andrés Fernández, más conocíu pol alcuñu lliterariu de Mánfer de La Llera. Dende l’agrupación, argumenten que lo faen «por caltener vivu’l nome y obra d’esti autor tan cercanu a la mina, la cultura asturiana y la so tierra llangreana, amás d’afalar la creación en llingua asturiana y los valores que lu movieron tola vida con una perclara inquietú esistencial y social».
Les bases pa poder concursar son estes:
Orixinalidá: Les obres tienen que ser orixinales y inédites, amás de que nun fueren
premiaes en dengún otru concursu.
Idioma: Esti premiu de narraciones curties va tener cuatro estayes, dos n’asturianu y
dos en castellán (caún de los dos idiomas va cuntar con una estaya pa mayores d’edá
y otra pa menores d’edá).
Tema y estensión: Magar que’l tema seya llibre, estimaráse que la obra seya espeyu
de los valores que guiaron la vida del escritor de Les Cuestes. Les narraciones han
escribise en lletra Times News Roman, tamañu de fonte 12 a doble espaciu y márxenes
estándar (marxen derechu: 3, izquierdu: 2,5, superior 2, inferior: 2), que vienen ser
unes 300 pallabres por páxina. La estensión mínima de cada rellatu (coles
característiques mentaes de lletra, fonte, interlliniáu y márxenes) tien que ser de 5
páxines y la máxima de 15 páxines.
Premios: Va dase un premiu de 1.200 (mil doscientos) euros pa la meyor narración
n’asturianu de mayores d’edá, un premiu de 200 (doscientos) euros pa la meyor
narración n’asturianu de menores d’edá, un premiu de 600 (seiscientos) euros pa la
meyor narración en castellán pa mayores d’edá y otru premiu de 100 (cien) euros pa la
meyor narración en castellán pa menores d’edá.
Participación: Cualquier persona va poder participar con un másimu de dos
microrrellatos (ún n’asturianu y otru en castellán, ya seya na categoría de mayores de
edá o na de menores de edá).
Convocatoria: La recepción d’orixinales va escomenzar el 14 de febreru de 2023 y los
autores participantes tendrán de plazu hasta’l 31 de marzu de 2023, inclusive, pa la
entrega d’orixinales. Van aceptase los orixinales que lleguen depués del 31 de marzu
siempres que la fecha del matasellos seya la d’esi 31 de marzu como mui tarde.
Unvíu: Los orixinales han mandase en sobre certificáu a Sociedá La Montera, C/
Leopoldo Fernández Nespral, 29. CP: 33900 Llangréu (Asturies).
Sobre y plica: Xunto coles señes de La Montera, el sobre tien d’especificar que se va
participar na “Primer Edición del Concursu de Microrrellatos Mánfer de la Llera”. Dientro
del sobre han mandase trés copies del microrrellatu, especificando na primer páxina de
cáuna d’elles el títulu de la obra, l’alcuñu del autor y l’idioma (asturianu o castellán) y
categoría (mayores o menores d’edá) na que se participa. Xunto coles tres copies del
microrrellatu, dientro del sobre grande ha incluyise otru sobre pequeñu, o plica, qu’ha
tener escrito nel esterior los mesmos datos que cada copia del microrrellatu: títulu,
alcuñu, idioma y categoría. Nel interior de la plica han especificase los siguientes datos:
el títulu de la obra y los datos personales del autor (alcuñu, nome y apellíos, tiempu,
DNI, señes, teléfonu y corréu electrónicu).
Xuráu: La Sociedá La Montera nomará un númberu impar de trés o cinco representantes
locales de la cultura pa facer parte del xuráu. Amestaráse al xuráu un miembro del
Equipu Directivu de La Montera que va actuar como secretariu del xuráu, ensin voz nin
votu. Nun se va poder retrucar a les decisiones del xuráu.
Deliberación: El 27 de mayu de 2023, el xuráu va axuntase nuna comida de
deliberación na sede de La Montera y proclamará’l resultáu de los ganadores esa mesma
tarde.
Entrega de premios: Los premios van entregase en ceremonia oficial durante les
fiestes de Santiago en Sama.
Aceptación de les bases: Pol fecho de mandar los sos rellatos, los autores declaren
tar d’acuerdu con estes bases.
