Ediciones Radagast ta acabante convocar un concursu de novela fantástica, ciencia ficción y terror pa xente mozo nel que va poder presentase cualquier persona, ensin distinción de nacionalidá, siempre que nun seya ganadora nuna edición previa d’esti concursu y tenga menos de 35 años a 31 d’avientu de 2021.
La llingua de les obres presentaes ha ser l’asturianu y tar escrita acordies coles normes de l’Academia de la Llingua Asturiana. La temática de la novela ha d’entrar no que se conoz como “Ficción Especulativa”, entendiendo dientro d’esta categoría les categoríes de lliteratura fantástica, ciencia ficción y terror.
La estensión de la novela sedrá d’un mínimu de 15.000 y un máximu de 50.000 pallabres. El premiu constará de Diploma Acreditativu, 300€ y espublización de la obra na colección correspondiente d’Ediciones Radagast. Los drechos d’autor de la primer obra entiéndense pagos col premiu.
El plazu de presentación de los exemplares acaba’l 1u de marzu de 2021. Les obres unviaránse per corréu a les señes de Radagast: Ediciones Radagast Plaza La Noceda 2, 6B 33010, Uviéu.
Les obres presentaránse baxo nomatu nun sobre zarráu por triplicáu (a doble espaciu y a doble cara) onde habrá constar el nome del premiu; esti sobre zarráu habrá venir acompañáu d’otru más pequeñu onde habrán constar los datos de contautu del autor (dirección, corréu, teléfonu y un currículu lliterariu).
El premiu podrá ser declaráu ermu si la calidá de los trabayos presentaos o’l númberu de trabayos presentaos lo aconseyaren. El xuráu tará formáu por escritores y traductores lliterarios designaos por Radagast. Ediciones Radagast resérvase tamién la posiblilidá de contautar a los autores de les obres finalistes d’especial calidá – si les hubiere – pa face-yos una propuesta editorial.
