Iris Díaz Trancho (Xixón, 1981) ye profesora y escritora, esperta en Filoloxía Asturiana y coautora de los llibros de testu de l’asignatura de Llingua Asturiana de la editorial Anaya. Nel ámbitu lliterariu espublizó pal públicu infantil títulos como La caxa de cristal (2004), La neña de les trences al revés (2009), Mio ma, la pirata (2010) y Vivo nuna casa malva (2011). Tamién cultivó’l rellatu curtiu con obres como Nome (2014) y Pincelaes (2014).
Falamos con Iris Díaz Trancho al rodiu del Premiu Máximo Fuertes Acevedo d’ensayu n’asturianu, reconocimientu qu’algamó na so XXXI edición cola obra Al verde d’El Cierru, de la que’l xuráu dixo que «destaca la calidá lliteraria de l’autora». La obra que-y valió’l prestixosu premiu «preséntase como un tratáu de botánica personal y orixinal que, a mou d’almanaque, consigue conectar lo llocal colo universal per aciu d’un llinguaxe llíricu y cargáu de sensibilidá.»
Nesta entrevista falamos de lliteratura y de reconocimientu, pero averámonos tamién a la brecha de xéneru en materia de premios lliterarios y qué significa too ello pa la propia Iris Díaz Trancho como muyer, madre y escritora.
¿Qué sensaciones tuvisti al recibir el Premiu Máximu Fuertes Acevedo, qué significáu tien esta reconocencia pa ti?
Llevaba dalgo más d’una década ensin escribir. Un tiempu mui venceyáu con unes circunstancies vitales que m’embuarriaron a entregame a tiempu completu a lo llaboral y la maternidá; ensin malapenes espaciu pa lo académico o lo lliterario.
Nesos años desarrollé un cultivu de lo individual, de la esfera propia, mui particular; que venía de la mano d’echar tiempu na finca familiar con xeres cencielles como desyerbar un cachu tierra o plantar un piñu bulbos. Nesos momentos calmos fui recomponiéndome como muyer y afilvanando na mio cabeza lo que sería esti testu.
El reconocimientu d’esti con un premiu de tantu prestixu ye pa mi estremadamente simbólico. Ye certificar la recomposición de la persona que soi, como muyer y muyer qu’escribe.
Acordies colo que dixo’l xuráu, l’ensayu combina la botánica con una visión bien personal, ¿qué puedes avanzanos de lo que vamos atopar na obra?
Tolos fechos naturales tán condicionaos polos tiempos y esos tiempos organizámoslos les persones, artificialmente, al traviés d’estaciones y meses que configuren calendarios. El testu ye la descripción de la vida d’una finca, la mía, “El Cierru”, a lo llargo d’un añu; estableciendo como fitos doce especies botániques de diferente triba: árboles, felechos, flores silvestres y cultivaes. Nesi contestu garro les descripciones más neutres y universales, pa llevales a la rellación qu’establecemos n’Asturies con estes plantes, y finalmente, la vinculación que tengo yo, nesi momentu precisu del calendariu y de la mio historia.
Son poques les muyeres qu’algamaron esti premiu dende la so fundación en 1992, ¿qué pasos camientes que faen falta pa siguir avanzando nesti camím d’equiparación?
Cualesquier trabayu d’investigación o de creación lliteraria tien de cuntar con un marcu de desarrollu, esto ye, precisa d’una dedicación mental y temporal enfocada al procesu. Pa la mio idea dacuando a les muyeres, o a lo menos nel mio casu, cuéstanos más tomar conciencia de qu’esta xera ye lo suficientemente importante como pa resta-y dedicación a otres facetes, normalmente venceyaes a lo llaboral o los cuidaos, entendíos nel sentíu ampliu, non solo los que vienen arreyaos a la maternidá. Tamién ye complicao que’l contestu que nos arrodia seya copartícipe d’esta dedicación, lliberándonos de xeres o simplemente faciendo la reflexón qu’esta sociedá sigue entendiendo como natural cuando se trata d’un home: nun puede, non nesti momentu, ta trabayando nuna cosa importante.
¿Cuál foi’l procesu d’investigación y desendolcu lliterariu que te llevó a completar esti ensayu?
L’ensayu tien muncho de trabayu de campu, anque evidentemente nun apaeza reflexao nel testu final. Tien un procesu organizáu de xubir a la finca, observar, conectar con una realidá botánica, dacuando planificada y otres veces emocional. Tamién d’un procesu de sacar una semeya, o delles, y pasala al papel pente medies d’un dibuxu. Esti pasu del trazu, mui torpe nel mio casu pero sí minuciosu, fue fundamental pa situame nel nucleu de la planta, pa poder realizar una descripción más precisa dende la qu’entamar.
Al par d’ello lóxicamente la llectura, d’un llau revisitando la obra d’autores asturianos y el so tratamientu de la botánica, tamién los trataos de naturalistes clásicos, como los de Élisée Reclus o Thoreau; y munchos ensayos botánicos asemeyaos a lo que yo quería construir, sobre manera, dime cuenta nel procesu, con voz de muyer.
Hasta agora caminares per siendes mui estremaes, como escritora de lliteratura infantil o llibros de testu, ¿cómo foi dar esti pasu al ensayu?
Los dos últimos títulos que tengo espublizaos, nel añu 2014, sí tienen muncho que ver con esti testu, o a lo menos, pienso que pue distinguise nellos cierta continuidá. D’un llau Nome, que ye una compilación de relatos, cuento que yá tienen la voz lliteraria pola que sigo transitando agora. Del otru, Pincelaes fala, con una organización tamién mui sistemática, de llugares que conecten con referencies culturales y personales. Ehí creo que yá diba marcando una llinia que sigo nesti Al verde d’El Cierru.
¿Qué papel te paez que xueguen los premios lliterarios nel sistema asturianu?
Como comentaba nuna de les primeres preguntes, los premios lliterarios en xeneral, pero mui especialmente nel ámbitu del asturianu los convocaos pola Conseyería de Cultura, suponen un elementu de prestixu importante. Formar parte de la nómina d’autores qu’algamaron estos premios ye un reconocimientu personal pol qu’entiendo naguamos munches de les persones qu’escribimos, con compromisu y amor, nesta llingua pequeña.
Retomando tamién una de les entrugues, como muyer qu’escribe, supón axuntame a los nomes de Vanessa Gutiérrez y Beatriz R. Viado, nel casu del Máximo Fuertes Acevedo; y de Marina Pangua, que ye la galardonada esti añu del premiu de novela Xosefa Xovellanos. Son tres muyeres a les qu’almiro sinceramente nel planu lliterariu, y el fechu de que Marina y yo, muyeres, madres, algamemos na mesma convocatoria dos de los premios con mayor trayectoria, sí me paez que pue analizase dende un puntu de vista simbólicu.
¿Qué próximos proyectos tienes en mente?
Les llectures que manexé pa la escritura d’Al verde d’El Cierru dieron pie al interés polos espacios comunes ente lliteratura y botánica, cuartos soleyeros y poco transitaos. Toi trabayando nel desarrollu de dalguna idea nesti sentíu, cenciella, que va poder conocese a lo llargu del añu qu’entra.
📸 Iris Díaz Trancho, semeya por Leticia Cernuda.
