Güei, miércoles 6 de payares, va producise la presentación del poemariu «Esti llugar qu’agora ye nuesu. Poemariu neanderthal» d’Aida Escudero. Amás de l’autora van participar nel actu, la escritora Marta Mori y Esther Prieto, d’Ediciones Trabe.
L’actu va tener llugar na Llibrería Trabe, asitiada nel 17 de la cai Fernando Alonso 17 d’Uviéu.
Ventisiete son los poemes que conformen «Esti llugar qu’agora ye nuesu» d’una novedosa y inusitada temática: al traviés de la dómina y los seres neanderthales l’autora fai una reflexón poética sobre los principales «argumentos» de la vida: l’amor, el pasu del tiempu, la perda… ensin desdexar problemátiques sociales como la situación de la muyer, la rellación del ser humanu col mediu en que vive, la solidaridá… trataos d’una forma bien curiosa y con un asturianu pulcru y urbanu.
Aida Fernández Escudero (Uviéu, 1985) ye filóloga y profesora de Llingua y lliteratura española y d’Asturianu na Enseñanza Secundaria. Con esti poemariu foi a ganar el Premiu «Fernán-Coronas» de Poesía na convocatoria del 2017 y col que se dio a conocer al gran públicu, anque yá tuviera poemes publicaos en revistes como Formientu, Lliteratura o Larius. Nel mesmu añu fíxose col Premiu Asturias Joven de Poesía cola obra Familia con autorretratu al fondu (2018).
