Recoyemos les pallabres de la conceyala Ana Solís na entrega de los premios de de rellatu curtiu L’horru d’El Carbayedo, el pasáu 29 d’avientu, na Casa Conceyu d’Avilés.
Bonos díes:
Tamos güei equí na XVI edición del premiu de rellatu curtiu L’horru d’El Carbayedo.
Asina que güei nun ye un día cualquiera y nun ye poles fiestes navidiegues, ye porque güei celebramos la llingua y la cultura que nos faen ser quien somos.
Una llingua nun ye solo un conxuntu de pallabres. Ye la ferramienta que caltién la memoria y la identidá. Y tien de ser futuru, y güei, equí, tamos defendendo esi futuru en costruyendo presente.
De mano, quiero dar les gracies a toles persones y asociaciones que, día tres día, lluchen paque l’asturianu siga vivu. Gracies por nun rendivos. Gracies por defender lo que ye nuestro. Gracies por demostrar que la identidá nun se negocia.
Cada taller, cada actividá, cada conversación en llingua asturiana ye un pasu más pa que la nuestra voz nun se pierda.
Gracies tamién a tolos participantes d’esta edición. 56 rellatos presentáronse. Caún d’ellos ye más qu’un testu: ye un actu d’amor a la nuesa llingua y una semiente cola que facer futuru.
Quiero facer una reconocencia especial a l’Asociación de Vecinos El Horreo del Carbayedo, que entamó esti premiu con tanta ilusión. A pesar de les dificultaes, la vuestra iniciativa abrió camín. Y naguamos por siguir caleyando per él.
Y, cómo non, gracies a la responsable de la Estaya de la Llingua d’Avilés. El so trabayu ye silenciosu, pero decisivu. Ye la prueba de que cuando hai compromisu, hai resultaos.
Nos, los y les politiques, tamos güei y mañana non, ye la vuesa voluntá y compromisu lo que caltien viva la cultura asturiana, bien de vegaes nes peores condiciones pola falta de respaldu institucional y el mundu neolliberal nel que vivimos, que nagua poles economíes d’escala y nun-y interesen les cultures dixebraes de la mayoría del mercáu.
Nos sabemos qu’Asturies nun sedría la mesma ensin la so llingua y les sos pallabres que ponen nome a toles coses propies y non propies.
La llingua ye la manera en que sentimos, en que contamos la vida, en que tresmitimos la nuestra hestoria, pero tamién ye una llingua funcional que sirve pa cualesquier interación, conocencia y novedá.
Cuando falamos asturianu, non solo usamos un idioma, tamos reivindicando en diciendo que queremos siguir siendo quien somos.
Por eso, cada rellatu que güei premiamos y caún de los que recibimos ye una ayalga escontra l’escaezu y una victoria escontra’l silenciu.
Agora, déxenme dicilo claro: l’asturianu tien de ser oficial.
Nun ye un caprichu. Nun ye una ocurrencia. Ye un drechu.
Nun ye lóxico que la nuestra llingua, con sieglos d’hestoria y con milenta voces que la falen, siga ensin la protección que merez.
La oficialidá ye la garantía de que nenguna persona tenga d’escoyer ente falar la so llingua o tener menos oportunidaes.
Tenemos que repitilo tolos díes, hasta que se cumpla: l’asturianu tien de ser oficial.
Como dixó Xuan Xosé Sánchez Vicente: «Una llingua que calla, muerre; una llingua que se fala, vive.»
Qu’esta frase resuene güei y siempre. Que resone en cada aula, en cada casa, en cada institución pa sellar el compromisu col nuesu herediu.
La oficialidá nun depende solo de les lleis. Depende de toos nós. Depende de que falemos, de qu’escribamos, de que lleamos n’asturianu.
Depende de que los mozos y moces sientan que la llingua ye útil, ye prestosa, ye parte de la so vida.
Por eso cada vegada que facemos usu d’ella tamos reivindicando y deprendiendo.
Gracies, de corazón, a tolos que facéis posible que la nuestra cultura siga viva. Sigamos trabayando xuntos, porque cada pasu cuenta.
¡Munches gracies!
