Nada nun hai más prestoso en segundu cursu d’Educación Secundaria que dir a esquiar a Payares colos compañeros y compañeres del institutu. Berta va facer snowboard y Ariel quier más esquiar. Van esfrutar como verderones, pero Ariel ha andar con procuru porque nun ta portándose bien esti cursu y pue tener una sorpresa. Pero pa sorpresa la que van llevar en viendo a Deva, l’amiga que fixeron dos años p’atrás na nieve de Ponga.
Esta ye la cuarta hestoria d’Ariel y Berta, de Xurde Fernández, con ilustraciones de David G. Ferrero, tres de «Ariel y Berta van pa Ponga», «Ariel y Berta en Baker Street» y «Ariel y Berta. Escursión per El Cabu Peñes». La edición cuerre a cargu de Trabe, dientro de la colección Montesín.
Xurde Fernandez (Candás, 1975) ye llicenciáu en Filoloxía Hispánica y especialista en Llingua Asturiana, de la que pon clase nel institutu de Candás. Conocíu a lo primero como narrador (cuentista y novelista), tien delles obres editaes (Volver, 2007; El color del escaezu, 2008, xunta Marián García; La espera, 2008; Ucrania y otros nomes de muyer, 2009; Díes d’iviernu, 2009; Intentu d’escritura, 2010; y Aeropuertu, xunta Marián García, 2011). Pero ye tamién poeta (Difícil, Premiu «Fernán-Coronas» de Poesía 2013), autor de testos dramáticos (Pa L’Habana, 2016) y d’una llarga retafila de llibros pa nenes y nenos.
