El profesor Xulio Viejo ta acabante asoleyar «Una introducción a la fonoloxía asturiana» con Ediciones Trabe. La obra, de más de quinientes páxines atiende colos distintos niveles d’análisis a los que se da l’estudiu fonolóxicu: dende la caracterización fonética de los soníos del asturianu hasta les propiedaes de la enunciación, pasando per unidaes intermedies (fonemes, sílabes, patrones métricos, etc.), con una perspectiva teórica abierta y en parte novedosa.
La descripción del estándar y les distintes variedaes actuales compleméntase con un estudiu evolutivu que mira a dar cuenta del procesu formativu del espaciu llingüísticu asturianu, atendiendo al so aniciu nel llatín de la romanización y al marcu comparativu qu’ofrez el conxuntu de llingües romániques, revisando delles propuestes avanzaes en trabayos anteriores.
Xulio Viejo Fernández (Uviéu, 1968) ye doctor en Filoloxía Románica y autor de diverses investigaciones sobre llingua y lliteratura asturianes, como La formación histórica de la llingua asturiana, Llingua y cultura lliteraria na Edá Media asturiano-lleonesa o Pensar asturiano, ente otros llibros, ediciones crítiques y artículos o obres de creación.
Como profesor de la Universidá d’Uviéu vien poniendo nos últimos años clases de fonoloxía asturiana, materia a la que se-y dedica esti volume, concebíu como un manual introductoriu que sistematiza’l conocimientu recibíu de la tradición filolóxica del últimu sieglu.
