El vienres 25 de xunu la Casa Cultura de Santuyano (Bimenes) va acoyer, de magar les 19:30 hores, l’actu de presentación de la primera novela de la escritora yerbata Blanca Fernández Quintana, titulada “L’home les caparines” y asoleyada por Radagast Ediciones.
L’actu contará cola participación de l’autora y de Marta Mori, tamién escritora amás de Vicepresidenta de l’Academia de la Llingua Asturiana y persona que firma’l prólogu’l llibru. Esta actividá ta organizada a comuña pola Asociación Entemuyeres y el Conceyu de Bimenes –qu’en cuenta de nun poder celebrar en condiciones de normalidá una nueva edición de la Fiesta de la Oficialidá de la Llingua Asturiana, tien previsto entamar una Selmana Cultural pola Oficialidá con delles actividaes culturales programaes– y cuenta col sofitu del Serviciu de Normalización Llingüística de la Comarca de la Sidra.
Precisamente pola situación sanitaria d’anguaño ye imprescindible acutar sitiu p’asistir al actu de presentación del llibru, llamando per teléfonu al númberu 985700004 o unviando un corréu electrónicu a la direición adl@bimenes.es.
