En 1993, un grupo d’autores asturianos (Dolfo Camilo Díaz, Ignaciu Llope, Xosé Nel Riesgo, Xulio Vixil, Xandru Martino, Xandru Fernández, Nel Amaro…) creen la denominada «Kdada Dazibao» en Corvera, un alcuentru dedicáu a la performance, siendo unu de los primeros que se crearon na península. L’actividá consiste en qu’escritores y artistes plásticos plasmen en cartelos de papel d’estraza de 3×1,20 metros (los Dazibao) poemes, haikus, poesía visual… que darréu van colocase n’espacios públicos. Los DAZIBAO fixeron kdaes añales en Corvera de 1993 a 2003 y tamién llevaron l’actividá a otros conceyos como L.lena, Llangréu o Avilés.
Esta tarde, a les 18:00 hores nel parque Europa, retomaráse la KDADA DAZIBAO n’homenaxe a unu de los sos fundadores, Nel Amaro, que protagoniza esti añu la Selmana de Les Lletres Asturianes, y ye por ello qu’esti añu lleva un sotítulu mui especial: «TOOS SOMOS PULGU!», n’alusión a un «perrín» qu’Amaro tuvo y cuidó hasta los sos últimos momentos: PULGU.
EN TOOS SOMOS PULGU (KDADA DAZIBAO) participarán tolos autores señalaos amás d’otros que se fueron axuntando colos años, como Roxelio Crespo, Cuinchi, Ánxel Nava y los más mozos que sofitarán la kdada como Rafa Valdés, Alma Hidalgo, Berto García o Inaciu Galán.
Los participantes, pa respetar los protocolos COVID van facer la so obra repartíos ente la plaza Europa, Auditoriu y Paséu de la Vuelta Ciclista. En casu de lluvia traslladaránse al teatru El Llar, onde se repartirán per escenariu, patiu de butaques y camerinos.
Una vegada iguaos los DAZIBAOS estos van ser espuestos -alredor de les 19:30 hores- en trés edificios de -Les Vegues: Centru Sociocultural, Tomás y Valiente y Teatru El Llar. Los Dazibaos van caltenese espuestos hasta les 13:00 hores del vienres 7 de mayu y l’actividá va ser grabada pa darréu ser espublizada na canal de YouTube TERRITORIU CORVERA.
Nesti mesmu contestu de la Selmana de les Lletres, la sesión de Cinefórum prevista pa güei n’El Llar, va consistir na proyección de trés curtios : DAZIBAOS EN LLANGRÉU: UNA ISLLA AL SUR DEL POLU NORTE; GUOR, de Javier Maqua y LA VIDA DE LES PIEDRES de Ramón Lluis Bande, a partir de les 19:15 hores.
