La Conseyería de Cultura, Política Llingüística y Turismu patrocina la segunda edición de la beca «Asturies» de lliteratura asturiana en residencia, organizada pola Residencia Lliteraria 1863. L’ayuda del Principáu va sofitar los gastos d’una residencia de creación lliteraria en llingua asturiana o n’eonaviegu n’A Coruña a lo llargo d’un mes. El plazu de solicitúes ta abiertu hasta’l próximu 15 de setiembre y les bases de la convocatoria puen descargase equí:
Bases de la Beca Asturies de lliteratura asturiana en residencia.
La Beca «Asturies» de lliteratura asturiana en residencia tien como finalidá’l sofitu, promoción y estímulu de la creación lliteraria en llingua asturiana y n’eonaviegu, potenciando’l so desenvolvimientu creativu col mayor rigor y escelencia. L’ayuda busca apurri-yos a los y les escritores en llingua asturiana un espaciu, un tiempu, un contestu y unes condiciones óptimes pa la entera dedicación al so propiu proyectu de creación lliteraria.
Pue presentase a la convocatoria cualesquier escritor o escritora en llingua asturiana o n’eonaviegu mayor de dieciocho años, con polo menos un llibru publicáu. El Principáu va sofitar con una subvención de 800 euros los gastos d’estancia de la persona que reciba finalmente la beca. La estancia va desenvolvese na Residencia 1863, allugada onde naciera la Real Academia Galega y a pocos pasos d’onde tamién vivieron Emilia Pardo Bazán, Rosalía de Castro o Pablo R. Picasso.
