El xuráu del Premiu Fernán Coronas de poesía aconceyó esti domingu 7, coincidiendo col aniversariu de la nacencia del escritor de Cadavéu, na so Casa Natal. El xuráu tuvo formáu por Inaciu Galán como presidente, Susana Sela como secretaria y polos escritores Carmen Guardado y Daniel García Granda, ganador de la edición anterior, nesti casu unviando les sos valoraciones al nun poder acudir.
Tres declarar trés finalistes y un llargu alderique, nel que se destacó la calidá llingüística y lliteraria de les obres presentaes, quince nesta edición, decidiéronse pol poemariu «Los fíos de Bauman», que resultó ser obra del Gonzalo Llamedo Pandiella.
El premiu entámalo la Sociedá Popular La Regalina dende va cuasi trenta años. Tien el mecenalgu del agospiu turísticu La Reserva de los Campos. La entrega faise cada 28 d’agostu na romería de la Regalina, creada pol Padre Galo, con un dicursu previu al tradicional pregón n’asturianu qu’instauró Fernán Coronas al recuperar la fiesta.
Como cada añu, tres la deliberación del xuráu, los miembros del xuráu y los vecinos de Cadavéu participaron nun homenaxe al Padre Galo na so tumba nel cementeriu del pueblu. Ellí ufriénronse una flores y lleéronse testos del poeta per parte de los miembros del xuráu, dellos vecinos y el Padre Milio Menéndez, vicariu episcopal d’Avilés-Occidente. Participó tamién el coru de Cadavéu, cantando delles pieces basaes nos poemes del Padre Galo. Darréu celebróse una espicha na casa natal del autor.
Gonzalo Llamedo Pandiella ye Doctor n’Investigaciones Humanístiques y anguaño Profesor de Filoloxía Románica na Universidá d’Uviéu. La escritura creativa ye una afición constante na so vida. Nos años 2003 y 2006 ye finalista de los V y VIII Concursos de Rellatu Comarca de la Sidra y, en 2004, tercer finalista d’Asturies nel 44 Concurso Nacional de Redacción de la Fundación Coca-Cola España. Más adultu, en 2016 y en 2017 asoleya dos microrrellatos pal Colectivu “Diversidad Literaria”. No cabero del 2018, estrénase cola escritura en llingua asturiana, resultando en 2019 ganador del II Concursu de Microrrellatos Luisa Rebollar de Sariegu y finalista nel VI Concursu de Microrrellatos La Voz del Barrio de Xixón. En 2020, collabora nel númberu 36 de la Revista Lliteratura y gana’l I Concursu #andanciulliterariu en Twitter d’Iniciativa pol Asturianu y el V Concursu de microrrellatos improvisaos n’asturianu pa la xente mozo Entaína a escribir. Asoleyó obra en dellos volúmenes colectivos y na revista Formientu.
