Daniel García Granda algama’l Teodoro Cuesta con «Guapura»

Daniel García Granda resultó ganador del Premiu Teodoro Cuesta de poesía n’asturianu na so XXXIV edición. La obra presentada por García Granda titúlase Guapura. El xuráu, reuníu ayer miércoles, escoyó esti poemariu ente los 24 presentaos, destacando “el ritmu, l’usu con procuru del idioma y la capacidá d’emocionar, asina como la posibilidá de topar la guapura na sutileza universal del instante que se proyecta nos versos y poemes». “En resume, un diálogu cola lliteratura y l’arte como ficieran Ana Blandiana, Cohen…”.

El xuráu tuvo formáu por María Fernández Abril, Alfredo Garay Menéndez, Pablo Rodríguez Medina, Rafel Rodríguez Valdés y Lluisa Suárez Sanz, actuando como presidenta la conceyala Belén Alonso Losa y como secretaria Elena Losa Carballido. El Premiu Teodoro Cuesta, dotáu con 4.000 euros, creóse nel añu 1991 y considérase’l más prestixosu de los que se convoquen n’Asturies nel ámbitu la poesía, contando nel so palmarés con autores de prestixu de les lletres asturianes como Berta Piñán, Vanessa Gutiérrez, Xuan Bello o Lourdes Álvarez. Nomes a los qu’agora s’amiesta Daniel García Granda.

Daniel García Granda (La Pola, Siero, 1972) ye llicenciáu en Filoloxía Inglesa y profesor de Secundaria. Ye autor de poemarios como Poemes del últimu salvaxe, El remediu, El raitán y el sangrín o Rosada 3.0 (ganador del Premiu Fernán Coronas nel 2021). Tamién tien escrito llibros infantiles como Versos d’Asturies, Amorina Motosierra y Prau. El llabor de García Granda estiéndese tamién al campu de la traducción con obres como El saber del país / Country wisdom de John Berger o In dubius battle / En llucha incierta de John Steinbeck (Premiu Florina Alías de traducción 2024).