Esti miércoles 7 de xunu, el recién nomáu académicu, David Guardado, presenta la so nueva obra «Nunca vencida. Una historia de la idea d’Asturies», espublizada por La Fabriquina. L’actu va ser n’Uviéu’l miércoles 7 de xunu a les 19.30 hores nel Club Prensa Asturiana de La Nueva España y va tar presentáu por Cristobal Ruitiña. Van acompañar al autor Pedro de Silva y Javier Fernández Conde.
«Nunca Vencida. Una Idea d’Asturies» ye una obra del filólogu y músicu David Guardado nel que repasa la representación d’Asturies a lo llargo los sieglos. Un ensayu fundamental de 524 páxines pa conocer la nuestra historia y reflexonar sobre la identidá asturiana.
«Asturies, cuna d’España o baluarte de l’anti-España; semiente de la plurinacionalidá peninsular o xerme de la so unidá; pionera del llaicismu o abellugu del catolicismu…
Nun ensayu valiente y revelador, David Guardado fai un repasu detalláu de les idees, los mitos y los discursos sobre Asturies qu’a lo llargo de la historia, dende la Edá Media hasta güei, compitieron por ser dominantes, amosando el so calter ideolóxicu.
Dende una perspectiva inédita, la obra analiza cómo la interpretación de los símbolos y la historia d’Asturies (los astures, Pelayo, Cuadonga, la francesada, la bandera, la llingua asturiana o la Revolución d’Ochobre), faen parte d’una batalla na que l’autor estrema dos xenealoxíes ideolóxiques opuestes: una mira al futuru y básase na afirmación de la singularidá asturiana, mientres que la otra mira al pasáu y constrúise dende la renuncia y la señardá».
