L’autor trabaya en dellos proyectos lliterarios y va participa de dos actos con públicu alredor de la «La península de las casas vacías», que sumá más de 200.000 exemplares vendíos
Ente los meses de setiembre y ochobre la Residencia Lliteraria Xixón recibe n’estancia creativa al escritor David Uclés, autor de la novela «La península de las casas vacías», que sumá más de 200.000 exemplares vendíos y que ta siendo un auténticu fenómenu lliterariu y social, premiáu con numberosos gallardones.
«Pa la Residencia Lliteraria Xixón ye un honor tener a un autor con una trayectoria tan esitosa y que tien amás una especial conexón con Asturies, que pue vese nos numberosos actos que vien celebrando nel país», esplica Inaciu Galán, director de la Residencia.
Uclés va participar de dos actos públicos que se van celebrar el domingu 28 de setiembre. El primeru a les cinco la tarde en La Revoltosa, y el segundu a les 18:30 hores en Toma3. Dos actos centraos nes sos reflexones, en formatu entrevista y con delles sorpreses pa los siguidores asturianos del autor andaluz.
David Uclés (Úbeda, 1990) Llicenciáu y máster en Traducción ya Interpretación por francés, alemán ya inglés, ye, amás, escritor, músicu y dibuxante. Espublizó les noveles La península de las casas vacías (Siruela/Premio Cálamo Mejor Libro 2024/Premiu Andalucía de la Crítica 2025/Premiu de Lliteratura de la Xunión Europea, candidatu español), Emilio y Octubre (Dos Bigotes) y El llanto del león (Premio Complutense de Literatura). Foi gallardonáu coles beques Leonardo y Montserrat Roig. Nes sos obres predomina’l realismu máxicu.
Trabayó n’Alemaña, Suiza y Francia, y tien escrito pa Cuadernos hispanoamericanos, La Vanguardia, Revista L y Actúa. Participó tamién en. dellos festivales lliterarios: Centroamérica Cuenta, Festival 42, FLEM, Book Friday y Literaktum, y punxo’l ramu a la Biennal de Pensament de Barcelona.
El so llibru más esitosu hasta’l momentu, La península de las casas vacías, algamó numberoses ediciones, y vendió yá más de 200.000 exemplares. Foi escoyida novela del añu 2024 en numberoses llistes estatales (#2 en Babelia; #1 en La Vanguardia, El Heraldo y Cadena Ser). Ta traduciéndose a numberosos idiomes y convirtióse nun verdaderu fenómenu editorial.
David Uclés va tar escribiendo estes selmanes dende la Residencia Lliteraria Xixón, dientro del ciclu d’estancies creatives de la residencia asturiana, que dirixe l’escritor Inaciu Galán.
Residencia Lliteraria Xixón
L’escritor y xestor cultural Inaciu Galán vivió nesti espaciu de Xixón a lo llargo de cuasi una década y en 2023 punxo a disposición l’apartamentu pa la creación lliteraria dende Asturies, buscando tender pontes con otres lliteratures, otres llingües, otres cultures…
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación, dende llugares como Galicia, Arxentina, Italia, Madrid, Inglaterra, Francia, Perú o’l País Vascu, ente otros.
