Skull city y otres histories ye una antoloxía fecha pol propiu autor y asoleyada por Ediciones Trabe que recueye una refilera testos de factura distinta escritos n’estremaes époques, unos yá espublizaos n’antoloxíes o periódicos diarios o selmanales (premiaos dalgunos) y otros inéditos. Hai tres novelines curties («Skull City», «La espedición» y «La piel»), microrellatos («Que nun se pierdan nel aire», «Fotograma»…), cuentos estrenaos en formatu monologu teatral («King-Kong»), testos eróticos que derrompieron una llinia de creación bien interesante y poco triada na lliteratura asturiana y ¡hasta una novelina per entregues! («Fueya de ruta»).
Amor, maltratu, mina, guerra civil, sexu, fantasía, aventura, zombis… Y tres de too ello, la mirada crítica del autor y la reflexión sobre’l ser humanu y la so organización social. Y más p’atrás tovía l’homenaxe sentíu a escritores y cineastes, noveles y películes que-y dexaron buelga nel tiempu de la infancia, que yera tamién el de la derrota y el western. Dolfo Camilo Díaz n’estáu puru.
Dolfo Camilo Díaz (Caborana, Ayer, 1963) ye hestoriador, xestor cultural y ún de los escritores más polifacéticos y prolíficos de les lletres asturianes. Narrador, ensayista y dramaturgu, tien publicaes una retafila noveles (Pequeña lloba enllena d’amor, Añada pa un güeyu muertu, Diariu de Viaxe, Suañé Cabu Verde, Imago, Advenimientu, L’arume…), dalgunes d’elles xuveniles (Blugás, Khaos, Memorial del monstruu, La mar); volúmenes de cuentos y rellatos (Nunca nun te fíes de la xente que nun enseña los dientes al rise y otros cuentos; Venus, Occidente y otros cuentos éticos...).
Como ensayista tien espublizaes ente otres obres El teatru popular asturianu, En tables. Escritor de trazu rápidu y áxil, amás de crear testos dramáticos (Psicokiller), estrenó pieces tan señalaes como País o Muyeres inesperaes). Persona inquieta, que se mueve nel mundu cultural asturianu como pez nel agua, tien escrito monólogos (Nelón y el sexu sentíu) y publicaes traducciones dende’l portugués y el francés al asturianu con obres de José Viale Moutinho y Jules Verne. Como narrador tien ganao los premios más prestixosos de la lliteratura asturiana: «Xosefa Xovellanos de Novela, en cuatro ediciones; «Montesín» de Lliteratura Xuvenil, en dos ocasiones; «María Josefa Canellada» de Lliteratura Infantil y Xuvenil, na convocatoria del 2016…
