El Festival international de poésie de Québec (FIP de Québec) ye un nuevu eventu lliterariu que se celebrará nel mes de marzu na capital quebequesa y que pretende convertir la ciudá nun espaciu d’alcuentru ente poetes, editores y públicos de distintos países. Les fundadores del festival, les poetes Natalie Fontalvo y Marie Blay, cuntaron tamién pa esta primer edición col escritor y xestor cultural bualés Miguel Rodríguez Monteavaro como parte de la organización.
La llingua como enllaz de resistencia poética
El festival naz cola vocación de dar visibilidá a la poesía contemporánea internacional en llingües minorizaes y pa crear pontes ente distintos sistemes llingüísticos y tradiciones lliteraries. La programación inclúi llectures públiques, presentaciones de llibros, alcuentros profesionales y actividaes culturales abiertes a la ciudadanía, con participación d’autores d’América, Europa y Asia. Esta primer edición del FIP de Québec tien como leit motiv “La langue comme lieu de résistance poétique” (‘la llingua como enllaz de resistencia poética’), una propuesta multidisciplinar y abierta, con sedes repartíes per distintos espacios culturales de la ciudá. L’oxetivu ye consolidar un nuevu festival internacional dedicáu de manera específica a la poesía y reforciar la proyección cultural de Québec nel ámbitu francófonu y global. La iniciativa, polo tanto, busca fomentar el diálogu intercultural y la circulación de voces poétiques d’oríxenes diversos, creando un espaciu d’intercambiu creativu y profesional pa les llingües, nesta ocasión, occitanu, mapuche, catalán, vascu, romanche, eslovenu, francés quebequense, wendat, innu-aimun, árabe palestinu, gallegu y asturianu.
Talentu asturianu na organización del FIP de Québec
La presencia de Miguel Rodríguez Monteavaro nel equipu organizador supón tamién una conexón directa cola creación lliteraria asturiana y cola defensa de la diversidá llingüística n’Europa, valores que tán presentes nel espíritu del festival. Rodríguez Monteavaro ye ún de los escritores asturianos contemporáneos que más actividá internacional ta desenvolviendo, con participación n’eventos poéticos en Grecia, India, Exiptu, Méxicu, Kenia, ente otros munchos países. La so obra, escrita orixinalmente en gallegu d’Asturies y asturianu foi traducida a más de 10 llingües y tamién ye’l responsable de Ciclu de poesía QED y del Festival Voces del fornu, dambos n’Uviéu. Nesti casu encárgase de comisariar la participación europea nel FIP de Québec.
El FIP de Québec aspira a convertise nun referente nel circuitu de festivales poéticos internacionales, con una programación que combina actividaes escéniques, recitales y alcuentros col públicu, reforciando la presencia de la poesía na vida contemporánea de Québec, un territoriu con un sentimientu bien fuerte de raigañu cultural y políticu.
